რატომ არ სურს ბილ გეიტსს თავისი მილიარდების შვილებისთვის დატოვება?

ბილ გეიტსს ჰყავს მეუღლე მელინდა და სამი შვილი: 22 წლის ჯენიფერი, 17 წლის რორი და 14 წლის ფიბი. ჯენიფერი პრესტიჟულ სტენფორდის უნივერსიტეტში სწავლობს და საცხენოსნო სპორტითაა გატაცებული.
რორი და ფიბი სკოლის მოსწავლეები არიან და მშობლებთან ერთად, სიეტლის გარეუბანში ცხოვრობენ.
ბილ გეიტსი და მისი მეუღლე დიდი ხანია, ქველმოქმედებას ეწევიან. მათ ბილ და მელინდა გეიტსების ფონდი დააფუძნეს, რომელიც განვითარებად ქვეყნებში ჯანდაცვისა და განათლების სისტემების განვითარებას ისახავს მიზნად. 1994 წლიდან მოყოლებული, ბიზნესმენმა საქველმოქმედო მიზნებისთვის 36 მილიარდი დოლარი დახარჯა.

ბიზნესმენის სურვილია, მისი გარდაცვალების შემდეგ ქონება შვილებსა კი არა, საქველმოქმედო ფონდს დარჩეს. ბილ გეიტსის თქმით, შვილებმა ამ გადაწყვეტილების შესახებ იციან და ეთანხმებიან.
„მილიარდების ნაცვლად, შვილებს საუკეთესო განათლებას ვაძლევ იმისთვის, რომ მემკვიდრეობის იმედად არ იყვნენ და ცხოვრებაში წარმატებას თავად მიაღწიონ“, - განაცხადა გეიტსმა.

რა თქმა უნდა, ბიზნესმენი შვილებს მთლად ხელცარიელს არ ტოვებს, თუმცა ზუსტად იმდენს მისცემს, რომ კარიერის შექმნისა და საკუთარი გზის პოვნაში ეყოთ.
„თუ შვილებს უზარმაზარ ქონებას დაუტოვებთ, ამით მხოლოდ ავნებთ. ეს მათ თვალსაწიერს დაუმახინჯებს და საშუალებას არ მისცემს, საჭირო მიმართულებით განვითარდნენ“, - დარწმუნებულია მილიარდერი.