დედის სიყვარული მარადიულია - 98 წლის ქალი 80 წლის შვილთან მოხუცებულთა სახლში გადასახლდა

დიდ ბრიტანეთში მცხოვრებმა 98 წლის ადა კიტინგმა დატოვა სახლი, სადაც გათხოვილი ქალიშვილი და შვილიშვილები თავს ევლებოდნენ და მოხუცებულთა სახლში მცხოვრებ 80 წლის მარტოხელა შვილთან გადასახლდა, რათა მის პირმშოს დედობრივი სითბო და მზრუნველობა არ მოჰკლებოდა.  

ადა კიტინგსა და მის განსვენებულ მეუღლეს ოთხი შვილი ჰყავდათ. აქედან უმცროსი გოგონა ბავშვობაში გარდაიცვალა.
პროფესიით მხატვარ-დეკორატორმა ტომ კიტინგმა ოჯახის შექმნა ვერ მოახერხა, ამიტომ სიბერეში იძულებული გახდა, საცხოვრებლად მოხუცებულთა თავშესაფარში გადასულიყო, რადგან გამუდმებულ ზრუნვას საჭიროებდა.
დედამ შვილთან განშორებას ერთ წელზე მეტი ვერ გაუძლო და მასთან თავშესაფარში გადასახლდა. ახლა ისინი გამუდმებით ერთად არიან.

„როცა სილამაზის სალონში თმის შესაჭრელად მივდივარ, ვიცი, რომ ტომი ჩემს დაბრუნებას მოუთმენლად ელის. დედას თავისი შვილი უკანასკნელ ამოსუნთქვამდე უყვარს. დედობა მარადიულია და ამას ვერავინ შეცვლის“, - ამბობს ადა კიტინგი.

მოხუცებულთა სახლის თანამშრომლების თქმით, მათთან მოხუცი მშობლებისა და შვილების ერთად ცხოვრება დიდი იშვიათობაა, ამიტომ მოყვარულ დედა-შვილს ყველა განსაკუთრებული სითბოთი და მზრუნველობით ეპყრობა.
„აქ თავს ძალიან კარგად ვგრძნობ და უსაზღვროდ ბედნიერი ვარ, რომ დედა ჩემ გვერდითაა. ის მუდმივად ჩემზე ზრუნავს და ზოგჯერ, როგორც პატარა ბავშვს, ისე მტუქსავს და მეუბნება, რომ კარგად უნდა მოვიქცე. როცა დედა გვერდითაა, თავი პატარა ბავშვი მგონია. ბედნიერებაა, როცა სოლიდური ასაკის მიუხედავად, დედას შვილზე ზრუნვა შეუძლია“, - ამბობს ტომი.