ერთხელ, ისი იუიტის მეგობარმა ქალმა სთხოვა, რომ მისი ქმრის როლი შეესრულებინა, რადგან კერძო სკოლის ადმინისტრაციამ მარტოხელა დედის შვილს მათთან სწავლის ნება არ დართო. ეს ფიქციური ნათესაობის წარმოდგენაში იუიტის პირველი და წარუმატებელი როლი იყო.
შემდეგ იუიტის სთხოვეს, 12 წლის გოგონას მამის როლი შეესრულებინა, რომელსაც თანაკლასელები უმამობის გამო დასცინოდნენ. მას შემდეგ რვა წელი გავიდა, გოგონამ სკოლა დაამთავრა, თუმცა იუიტის დღემდე თავის ერთადერთ და ნამდვილ მამად მიიჩნევს.
Family Romance-ის თანამშრომლებს უფლება არ აქვთ, კლიენტის ნებართვის გარეშე საიდუმლო გაამხილონ. თუ კომპანიაში დასაქმებული მსახიობის „ქალიშვილი“ გათხოვდა, ის ვალდებულია, ქორწილში მივიდეს, მამის როლი შეასრულოს და თუ საჭიროა, ბაბუობაც გაითამაშოს.
კლიენტი თავად განსაზღვრავს, როგორ უნდა გამოიყურებოდეს და იქცეოდეს დაქირავებული ნათესავი. როგორი ვარცხნილობა და ჩაცმის სტილი უნდა ჰქონდეს და როგორ ხასიათზე დაბრუნდეს სამსახურიდან „სახლში“.
ზოგჯერ მსახიობებს მოღალატეების როლის თამაშიც უწევთ. მაგალითად, თუ ქალის ქმარმა გაიგო, რომ ცოლს საყვარელი ჰყავს და მასთან ურთიერთობის გარკვევა სცადა, ცოლს შეუძლია, ფირმის თანამშრომელი დაიქირაოს, რომელიც ცრუ საყვარლის როლს შეასრულებს და დარტყმას საკუთარ თავზე აიღებს. ასეთ შემთხვევაში, მსახიობი ხშირად თავს იაკუძას დანაშაულებრივი სინდიკატის წევრად ასაღებს და ქმარს პატიებას სთხოვს. უმეტეს შემთხვევაში, ქმარი პატიებას არჩევს, რადგან ბანდიტებთან საქმის დაჭერა არავის სურს.
ზოგჯერ კომპანიის მსახიობებს მასშტაბური ქორწილისთვის ქირაობენ. ერთ-ერთ კლიენტს ქორწილისთვის 50 მსახიობის დაქირავება თითქმის 18 მილიონი დოლარი დაუჯდა.
როგორი დაუჯერებელიც არ უნდა იყოს, Family Romance-ში ბავშვის დაქირავებაც შეიძლება. მაგალითად, ერთხელ კომპანიამ მომაკვდავი მოხუცის სურვილი შეასრულა, რომელსაც სიკვდილის წინ შვილიშვილის ნახვა სურდა. იმ დროისთვის ბავშვი დაბადებული არ იყო, ამიტომ მომაკვდავის ქალიშვილმა კომპანიისგან ჩვილი იქირავა.
Family Romance-ში საათობრივი ანაზღაურებაა - საათში 200 დოლარი. მსახიობებს აკრძალული აქვთ პირადი ინფორმაციის გამხელა. ამასთანავე, შეყვარებულის, საყვარლის ან მეუღლის როლის შესრულებისას ეკრძალებათ კლიენტის კოცნა და მასთან სექსი.