კრემაციისთვის გამზადებული ინდოელი ბავშვი ცოცხალი აღმოჩნდა

ინციდენტი ინდოეთის დედაქალაქში მოხდა. ახალგაზრდა ქალმა ტყუპები გააჩინა. მშობიარობის შემდეგ, ექიმებმა მშობლებს გამოუცხადეს, რომ გოგონა გარდაიცვალა, ხოლო კრიტიკულ მდგომარეობაში მყოფ ვაჟს ხელოვნური სუნთქვის აპარატზე შეერთება სჭირდებოდა.

ოჯახს პროცედურების ჩატარებისთვის აუცილებელი თანხა არ აღმოაჩნდა, ამიტომ გადაწყვიტეს, ბავშვი სხვა საავადმყოფოში გადაეყვანათ, თუმცა ვერ მოასწრეს - ექიმებმა შეატყობინეს, რომ მეორე ბავშვიც გარდაიცვალა.
სამედიცინო ცენტრის თანამშრომლებმა დამწუხრებულ მშობლებს კრემატორიუმში გადასატანად, ჩვილები პოლიეთილენის პაკეტებით გადასცეს. კრემატორიუმისკენ მიმავალმა მშობლებმა ერთ-ერთ პაკეტში მოძრაობა შენიშნეს და აღმოაჩინეს, რომ ბიჭუნა ცოცხალი იყო. ბავშვი უახლოეს საავადმყოფოში გადაიყვანეს და ამჟამად, მისი მდგომარეობა სტაბილურია.

მომხდართან დაკავშირებით, ინდოეთის ჯანდაცვის სამინისტროში მოკვლევა დაიწყეს. კლინიკა Max Hospital-ის ექიმი, რომელმაც ბიჭის სიკვდილის ცნობა გასცა, სამსახურიდან გაათავისუფლეს. ამჟამად, ხელისუფლება ჩვილის მშობლებს ყველა აუცილებელ დახმარებს უწევს.