7 წლის წინათ ესპანეთის ქალაქ მალაგაში ხუან ესკუდეროს სეხნია და მოგვარე გარდაიცვალა. მიუხედავად იმისა, რომ ჩვენი ისტორიის გმირი ამ დროს ქალაქ ალკალა-დე-გუდირაში ცხოვრობდა და თავს მშვენივრად გრძნობდა, ადგილობრივმა ხელისუფლებამ რატომღაც სწორედ ცოცხალი და საღ-სალამათი ესკუდერო „დაასაფლავა“.
თავიდან ხუანა და მისი ოჯახი სულელ ჩინოვნიკებს დასცინოდნენ, მაგრამ მალე მიხვდნენ, რომ საქმე სასაცილოდ არ ჰქონდათ.
საკუთარი „გარდაცვალების“ შესახებ ქალბატონმა ხუანამ შემთხვევით, ექიმთან ვიზიტის დროს გაიგო. სოციალური დაზღვევის მონაცემების მიხედვით, მას გამოუცხადეს, რომ დიდი ხნის გარდაცვლილია და ცოცხალი ადამიანებისთვის განკუთვნილი დაზღვევა არ ეკუთვნის.
საბედნიეროდ, კლინიკაში ხუანას ნაცნობი ექიმი აღმოაჩნდა, რომელმაც სამედიცინო შემოწმება ჩაუტარა. ქალმა სწორედ მისგან გაიგო, რომ ხელისუფლებამ ცოცხლების სიიდან დიდი ხნის წინათ ამოშალა.
„როცა ექიმმა ჩემი სახელი კომპიუტერში ჩაწერა, აღმოჩნდა, რომ მე გარდაცვლილი ვარ. ვიფიქრეთ, რომ ეს პროგრამული შეცდომა იყო, ამიტომ მის გამოსასწორებლად სოციალურ სამსახურში მივედი. იქ მითხრეს, რომ ყველაფერი ისე მარტივად არაა, როგორც მეგონა“, - ამბობს ხუანა ესკუდერო.
შვიდი წელია, „ცოცხალი მიცვალებული“ ხან ერთ, ხან მეორე ჩინოვნიკთან მიდის და ცდილობს, დაამტკიცოს, რომ ცოცხალია, თუმცა ჯერჯერობით უშედეგოდ.
უპასუხისმგებლო ჩინოვნიკების შეცდომის გამო, ქმრის გარდაცვალების შემდეგ ქალმა მემკვიდრეობის გადაფორმება ვერ მოახერხა.
2012 წელს ხუანამ მართვის მოწმობის განხლება სცადა, თუმცა ისევ პრობლემას წაწყდა - ქალს პირდაპირ გამოუცხადეს, რომ გარდაცვლილებს მანქანის ტარება აკრძალული აქვთ...
ქალს დღემდე არ შეუძლია სამედიცინო მომსახურებით სარგებლობა, რადგან მკვდარს მკურნალობა არაფერში სჭირდება.