დედოფალი ელისაბედ მეორე და პრინცი უილიამი ტრაგედიის ადგილზე მივიდნენ და გადარჩენილი ადამიანები მოინახულეს, რომლებიც სპორტულ დარბაზ „უესტვეის“ აფარებდნენ თავს. დედოფალმა და პრინცმა ანუგეშეს ადამიანები, რომლებმაც ხანძრის დროს ოჯახის წევრები დაკარგეს.
რაღაც მომენტში პრინცმა უილიამმა ემოცია ვერ შეიკავა და ასაკოვანი ქალი, რომელიც დაკარგულ ქმარს დასტიროდა, გულში ჩაიკრა. ხანძრის დროს ფატიმა ჯაფარის ქმარი ლიფტში იმყოფებოდა და მას შემდეგ ის აღარავის უნახავს. მწუხარებით განადგურებული ქალის ხილვისას, პრინცმა სამეფო კარის წესებზე თვალი დახუჭა. ის მიხვდა, რომ სიტუაცია იმაზე მეტს ითხოვდა, ვიდრე სტანდარტული ხელის ჩამორთმევაა.
„ჩემთან, ერთ უბრალო ქალთან, ამ ქვეყნის დედოფალი და მომავალი მეფე მოვიდნენ, რათა თანაგრძნობა გამოეხატათ. მე დავინახე, რომ მათთვის მომხდარი სულერთი არ ყოფილა“, - განაცხადა მოგვიანებით ჯაფარიმ.
ამ ფოტომ, რომელზეც მგლოვიარე ქალი და პრინცი არიან აღბეჭდილი, მსოფლიოს გაახსენა უილიამის დედა, პრინცესა დიანა, რომელიც კლინიკებში პირბადისა და ხელთათმანების გარეშე შედიოდა და მძიმე ავადმყოფებს გულში იკრავდა. პრინცესა გამუდმებით არღვევდა სამეფო ეტიკეტს და დაავადებულ ბავშვებს იხუტებდა, რათა სამყაროსთვის შეეხსენებინა, რამდენად მნიშვნელოვანია ადამიანების მიმართ სითბოსა და მზრუნველობის გამოჩენა.
უილიამის ჟესტი ბრიტანელებმა ნამდვილი ლიდერის ქცევად შეაფასეს, რომელსაც ქვეყნის გაერთიანება შეუძლია. დედის კვალზე მიმავალი პრინცი თავისი ქვეყნისთვის იმედის სიმბოლოდ იქცა. მან შესანიშნავად მოახერხა თანაგრძნობისა და სიყვარულის გამოვლენა, რაც ადამიანებს ჩვენს დროში ასე სჭირდებათ.