ჟაკლინმა და მარკმა ექიმებისგან ორსულობის მეოცე კვირაზე შეიტყვეს, რომ მათი ტყუპი გოგონა გულით, ღვიძლით, მკერდითა და დიაფრაგმით იყვნენ შეზრდილები. გადარჩენის არანაირი შანსი არ არსებობდა - მათ ერთი გული ჰქონდათ!
წყვილმა სამედიცინო ცენტრ „UF Health Shands Hospital”-ის დოქტორ ჯენიფერ კო-ვუსთან გაიარა კონსულტაცია. უფრო დაწვრილებითი ანალიზის შედეგად ექიმმა თეორიულად დაუშვა, რომ ტყუპები დაშორების ოპერაციას გადაიტანდნენ, მაგრამ რისკი უდიდესი იყო. საერთო გულის გაყოფას შეიძლებოდა, ორივეს ან ერთ-ერთის დაღუპვა მოჰყოლოდა.
„გარკვეული დრო დაგვჭირდა, რათა ეს გაგვეაზრებინა“, - განაცხადა ჟაკლინმა შემდგომ ინტერვიუში.
„ბევრი გვეუბნებოდა, რომ არაფერი გამოვიდოდა და სიტუაციას შევგუებოდით“, - დაამატა მარკმა.
ტყუპები სკარლეტი და სავანა 2016 წლის აპრილში საკეისრო კვეთის შედეგად დაიბადნენ.
ორი თვის შემდეგ დაშორების ოპერაცია გაუკეთდათ.
მანამდე კი ექიმებმა 3D-პრინტერზე დაბეჭდილ მოდელზე წაივარჯიშეს.
რვასაათიანი ოპერაცია წარმატებით დასრულდა, რის შემდეგაც ტყუპები ექვსი კვირის მანძილზე ფილტვების ხელოვნური ვენტილაციის აპარატზე იყვნენ მიერთებულები.
„გოგონები თავს მშვენივრად გრძნობენ. ისინი მებრძოლები არიან", - დაწერა ჯენიფერ კო-ვუმ თავის ბლოგში.
დოქტორი მარკ ბლეივისი, სამედიცინო ცენტრის დირექტორი წერდა: „ყოველდღე მივდივარ და ვხედავ ცოცხალ და ჯანმრთელ გოგონებს თავიანთ საწოლებში. ეს ფენომენალურია“.
„მათი გამოჯანმრთელების პროცესი ძალიან სწრაფად წავიდა. ჩვენ მათი ოჯახი მათ დაბადებამდე გავიცანით და ამიტომაცაა, კარგი ურთიერთობა რომ გვაქვს", - განაცხადა დოქტორმა ბლეივისმა ინტერვიუში.
