მირაჟი ატმოსფეროს ოპტიკური მოვლენაა, როდესაც ჰორიზონტთან ჩნდება დედამიწაზე არსებული საგნების ცრუ გამოსახულებანი.
მირაჟი უფრო ხშირად უდაბნოს ცხელ ქვიშრობებში შეინიშნება - გავარვარებული ქვიშა ახურებს ჰაერის ქვედა ფენებს, რის შედეგადაც ჰაერის სიმკვრივე მცირდება. შორი საგნიდან მომავალი სინათლის სხივი ზღვრული კუთხით ეცემა ჰაერის ქვედა ფენებს, რის შედეგადაც სხივი კი არ გადატყდება, არამედ შინაგან არეკვლას განიცდის და მხოლოდ ამის შემდეგ ხვდება თვალს. ასე იქმნება მოჩვენებითი სურათი.
საჰარის უდაბნოში ყოველწლიურად მირაჟის, დაახლოებით, 160 000 გამოჩენას აფიქსირებენ.
უდაბნოში მოგზაურებისთვის შედგენილია სპეციალური რუკები, რომლებზეც მითითებულია ადგილები, სადაც მირაჟები ყველაზე ხშირად ჩნდება.
ამ რუკებზე აღნიშნულია, სად უნდა ელოდოთ წყლის, პალმის კორომების ან ტბის მირაჟის გამოჩენას.
ყველაზე ხშირად მირაჟების მსხვერპლნი ორგ-ერ რავის უდაბნოში მოძრავი ქარავნები ხდებიან. ადამიანების თვალწინ, ჩანჩქერებითა და მწვანე კორომებით დამშვენებული, თვალწარმტაცი ოაზისი ისე ცხადად გადაიშლება, თითქოს შესაძლებელია, ხელით მისწვდე. სინამდვილეში კი 700-800 კილომეტრის სიშორეზეა.