ბევრისთვის საყვარელი მანქანის „Wolksvagen“-ის გამოშვებას მსოფლიო ჰიტლერს უნდა უმადლოდეს. 1933 წელს სწორედ მას მოუვიდა თავში აზრი, რომ გერმანელი მოქალაქე და „ნამდვილი არიელი“ უფრო მობილური უნდა იყოს და საკუთარი ავტომობილით გადაადგილდებოდეს.
1934 წლის ზაფხულში სასტუმრო „Kaiserhof“-ის ერთ-ერთ დარბაზში ჰიტლერი „დაიმლერ-ბენცის“ კომერციულ დირექტორს იაკობ ვერლინსა და ცნობილ ავსტრიელ კონსტრუქტორს ფერდინანდ პორშეს შეხვდა. საუბრის დროს ჰიტლერმა მანქანის მონახაზი თავად გააკეთა.
ამ შეხვედრიდან ოთხი წლის შემდეგ „Wolksvagen“-ის პირველი მანქანა კონვეიერიდან ჩამოვიდა...
ჰიტლერმა მანქანებს გასაოცრად დაბალი ფასი - 250 დოლარი დაადო და წარმოების განვითარებისთვის ასეთი აქცია მოიფიქრა: მესამე რეიხის ნებისმიერი მოქალაქე, რომელიც სპეციალურ ანგარიშზე ყოველკვირეულად ხუთ მარკას შეიტანდა და ამგვარად მანქანის შეძენისთვის საჭირო 990 მარკას დააგროვებდა, კონვეიერიდან ჩამოსულ მანქანას პირველ რიგში მიიღებდა.
1941 წელს ბერლინის ბანკში 336 668 გერმანელმა 110 მილიონ მარკაზე მეტი შეიტანა. ამასობაში, ომიც დაიწყო და ავტომობილების მწარმოებელი ქარხანა სასწრაფოდ სამხედრო რეჟიმზე გადააწყვეს. 336 668 ნამდვილ არიელს აღარც თავისი ფული უნახავს და აღარც ავტომობილი.
გერმანულმა სასამართლომ მხოლოდ 1961 წელს გადაწყვიტა, რომ დაზარალებულებისთვის კომპენსაცია გაეცა - ან ავტომობილის, ან ფულის სახით.