არქტიკაზე ანომალიურად თბილი ტემპერატურა მეორე წელია, გრძელდება. დანიელი მეცნიერების ინფორმაციით, არქტიკის ყინულოვანი საფარი, რომლის სისქეც ჩრდილოეთ პოლუსის მდგომარეობის მთავარი ინდიკატორია, კატასტროფული სისწრაფით დნება, ეს კი ტემპერატურის დათბობას იწვევს.
კვლევების წარმოების მანძილზე, 2016 წლის ნოემბერში არქტიკის ყინულოვანი საფარის ფართობმა კრიტიკულ ზღვარს მიაღწია და 4,14 მილიონი კვადრატული კილომეტრი შეადგინა - ეს, საშუალოდ, 2.56 მილიონი კვ.კმ-ით ნაკლებია, ვიდრე იყო 1979-2000 წლებში.
სწორედ 1979 წელს დაიწყო ყინულის დნობაზე თანამგზავრიდან დაკვირვება.
სხვათა შორის, დანიელი მეცნიერებისვე ინფორმაციით, იყო დრო, როცა არქტიკის ყინულოვანი საფარის ფართობი დღევანდელზე 2-ჯერ მცირეც ყოფილა - დაახლოებით, 10 ათასი წლის წინათ.
ათასობით წლის წინათ არსებული ყინულის საფარის სისქე კოპენჰაგენის უნივერსიტეტის მეცნიერებმა სპეციალური მეთოდით გაზომეს - კერძოდ კი, მათ გრენლანდიის ჩრდილოეთ სანაპიროზე ოდესღაც გამორიყული ხის ვეებერთელა ტივტივების რადიოკარბონული ანალიზი ჩაატარეს.
მკვლევარები ვარაუდობენ, რომ არქტიკის შემდგომი ბედის პროგნოზირებისთვის ჰაერის ტემპერატურა ერთადერთი ფაქტორი არ არის და არანაკლები როლი აქვს დინებებსა და ქარებს.