ანა ჰანენ სვენი 1846 წელს ბრიტანეთის კანადაში დაიბადა (ასე იწოდებოდა ბრიტანეთის საკუთრებაში მყოფი ტერიტორია ამერიკის ჩრდ. ნაწილში 1839-1982 წლებში). მისი მშობლები შოტლანდიიდან იყვნენ ემიგრირებულები. მათ ჰყავდათ 13 შვილი და, ანას გარდა, ყველა ნორმალური სიმაღლის იყო.
ანა 15 წლის ასაკში 2 მ.10 სმ.-ს და 100 კილოგრამს აღწევდა. გოგონა ძალიან ნიჭიერი იყო - უკრავდა, მღეროდა. იგი იმ დროისთვის ძალიან პოპულარული შოუმენის ფინეას ბარნუმის ცირკში წარმატებით გამოდიოდა.
მარტინ ვან ბიურენ ბეიტსი 1837 წელს აშშ-ში დაიბადა. 6 წლამდე ის ჩვეულებრივ ვითარდებოდა, თუმცა 7 წლიდან ბიჭუნამ არანორმალური ზრდა დაიწყო. 14 წლის ასაკში უკვე 2 მ.10 სმ. სიმაღლის იყო და 140 კგ. იწონიდა.
მარტინი სკოლაში მასწავლებლად მუშაობდა. მიუხედავად იმისა, რომ მისი სიმაღლის ადამიანი მტრისთვის ადვილი სამიზნე გახდებოდა, სამოქალაქო ომში მონაწილეობას ვერ ასცდა. ომიდან კი კაპიტნის ჩინით დაბრუნდა.
ერთხელ მარტინი ანას მშობლიურ ქალაქში მოხვდა და ბედმა ორი გიგანტი ერთმანეთს შეახვედრა.
იმ დროისთვის მარტინი 34 წლის იყო, ანა - 25 წლის.
გაცნობიდან რამდენიმე თვეში წყვილი დაქორწინდა. ამ ქორწილის ამბავი გაზეთების პირველ გვერდებზე იყო გატანილი, გიგანტ წყვილზე ყველა ლაპარაკობდა. ანას და მარტინს ძვირფასი საჩუქრები დედოფალმა ვიქტორიამაც გაუგზავნა...
ანამ ორი შვილი გააჩინა, თუმცა ორივე დაბადებიდან რამდენიმე დღეში დაიღუპა. მეორე ახალშობილი 10 კგ-მდე იწონიდა და ქალს უმძიმესი მშობიარობა ჰქონდა. ამან ანას ჯანმრთელობა ძლიერ შეარყია და ის მალევე, 42 წლისა გარდაიცვალა.
ცოლის გარდაცვალებიდან რამდენიმე წელიწადში მარტინი მეორედ დაქორწინდა - ამჯერად ნორმალური სიმაღლის ქალზე ანეტ ლავან ვეზერბიზე, რომელთანაც სიკვდილამდე იცხოვრა. მარტინი 82 წლის ასაკში გარდაიცვალა.