ისეთი „დიდი კატები“, როგორებიც ვეფხვი და იაგუარი არიან, შესანიშნავად ცურავენ. ეს თვისება მტაცებლებს ნადირობისას ძალიან ეხმარება. განსაკუთრებით, თუ მსხვერპლს კატის წყლის მოშიშობაზე მოარული ჭორების სჯერა და წყალში დამალვას ცდილობს.
საქმეს თუ სჭირდება, ლეოპარდიც მზადაა, გაცუროს, თუმცა უფრო მეტ მოცურავეს „პატარა კატებს“ შორის შეხვდებით, რომელთა რიცხვში შინაური კატებიც არიან. ამის ერთ-ერთი მაგალითია „თევზმჭერი კატა“, რომელიც მშვენივრად ყვინთავს წყალქვეშ. კატის ეს ჯიში, ძირითადად, თევზით იკვებება და საკვების მოპოვებას ერთნაირი წარმატებით ახერხებს წყალშიც და ხმელეთიდანაც (თათის დახმარებით).
წარმატებული ნადირობისთვის ბუნებამ ფისოები დამატებითი „ატრიბუტებით“ დაასაჩუქრა - მათ თათებზე ბრჭყალებს შორის, თხელი აპკი აქვთ, რომლის დახმარებითაც წყალშიც ადვილად ცურავენ და თევზსაც მოხერხებულად იჭერენ.