კვლევის მიმდინარეობისას, რომელიც ამერიკაში, კანადაში, დიდ ბრიტანეთში, საფრანგეთში გერმანიაში, იტალიაში, ესპანეთში, იაპონიასა და ავსტრალიაში მიმდინარეობდა, 2200 დედა გამოიკითხა. მათ დაურიგდათ კითხვარი, რომელშიც უნდა მოენიშნათ, რომელ უნარებს ფლობს მათი შვილი.
როგორც გაირკვა, 2-დან 5 წლამდე ბავშვების:
69% მშვენივრად ფლობს კომპიუტერის „თაგუნიას“ (მაუსს);
63%-ს შეუძლია კომპიუტერის ჩართვა და გამორთვა;
58%-ს შეუძლია, მარტივი კომპიუტერული თამაშები ითამაშოს;
28%-მა იცის, როგორ უნდა დარეკოს მობილურ ტელეფონზე;
25%-მა იცის ვებბრაუზერის ჩართვა
19%-ს მობილურ აპლიკაციაში მუშაობაც კი გამოსდის;
16%-ს ბრაუზერის ჰიპერბმულებში გადასვლა შეუძლია;
15%-მა თუნდაც ერთი ვებგვერდის მისამართი იცის;
5%-მა კი - რომელიმე ფოსტის მისამართი.
მკვლევარები აღნიშნავენ, რომ ბავშვებს კომპიუტერთან ურთიერთობა უკეთ გამოსდით, ვიდრე ველოსიპედით სეირნობა ან ტანსაცმლის ჩაცმა.
მაგალითად:
ველოსიპედით სეირნობა ამ ასაკობრივი ჯგუფის ნახევარზე მეტმა იცის;
სამ მეოთხედს შეუძლია მარტივი თავსატეხის ამოხსნა;
37%-მა იცის, როგორ დაწეროს საკუთარი სახელი და გვარი;
27%-ს შეუძლია საუზმე გაიმზადოს (საუბარია რძეში შვრიის ფანტელების ჩალბობაზე);
20% მშობლების დაუხმარებლად ცურავს;
ფეხსაცმელზე ზონარების შეკვრა ბავშვების მხოლოდ 11% ეხერხება (რა თქმა უნდა, გახსნა ყველას გამოსდის).
მკვლევარები აღნიშნავენ, რომ ბავშვებმა, ტექნიკური უნარების ფლობის პარალელურად, აუცილებლად უნდა იცოდნენ ინტერნეტუსაფრთხოების წესები.
„შესაძლოა, სამყარო იმაზე საშიში არაა, ვიდრე 20 წლის წინათ იყო, მაგრამ ინტერნეტის წყალობით, ეს საფრთხეები თითქმის კარს მოგვადგა. შესაძლოა, თქვენმა შვილმა იცის, რომ უცნობ ადამიანს კარი არ უნდა გაუღოს, მაგრამ საეჭვოა, იცოდეს, როგორ უნდა ჩაუკეტოს უცნობს თქვენს ინტერნეტსამყაროში შემოსასვლელი გზა“, - ამბობს AVG-ს გენერალური დირექტორი ჯეი სმიტი.
ეს კომპანიის მეორე კვლევაა, რომელიც ციფრული ეპოქის ბავშვების განვითარებას ეხება. აღსანიშნავია, რომ პირველი კვლევა მშობლებზე ჩატარდა, რომლებსაც საკუთარი შვილების სურათების ინტერნეტში განთავსება უყვართ. ამასთანავე, საზოგადოებრივ დომენში და ზოგჯერ იარაღით ხელშიც კი.