ჩინელებმა კლონირებული ძროხისგან ქალის რძე მიიღეს

მეცნიერებმა დაადგინეს, რომ გენმოდიფიცირებული ცხოველის რძე შეიცავს ლიცოზიმს (ცილა, რომელიც ახალშობილებს მიკრობული ინფექციებისგან იცავს), ლაქტოფერინს (ცილა, რომელიც ახალშობილის იმუნურ სისტემას აძლიერებს) და ალფა-ლაქტალბუმინს.
ამის გარდა, ჩინელმა მეცნიერებმა რძეში ცხიმის შემცველობა გაზარდეს და საჭირო ნივთიერებების შემადგენლობა ქალის რძესთან მიახლოებული გახადეს.

ლი და მისი კოლეგები ვარაუდობენ, რომ ტრანსგენური ძროხის რძე ისეთივე უსაფრთხოა, როგორც ჩვეულებრივი.
„10 წლის შემდეგ ასეთი ძროხებისგან მიღებული პროდუქტი ყველა მაღაზიის დახლზე იქნება“. - დარწმუნებულია პროფესორი, თუმცა მის მოსაზრებას ბევრი მეცნიერი, ექიმი და დიეტოლოგი არ იზიარებს.

კლონირებული ძროხის რძის მოწინააღმდეგეები ამბობენ, რომ ჩინელი მეცნიერების ჩატარებულ ორ ექსპერიმენტში 42 ხბოდან ცოცხალი მხოლოდ 26 დარჩა - ათი დაბადებისთანავე დაიღუპა, ექვსი კი - სიცოცხლის პირველი ექვსი თვის მანძილზე. „კლონირებულ ცხოველებს ჯანმრთელობის პრობლემა აშკარად ჰქონდათ. მათი რძე აუცილებელ შემოწმებასა და კლინიკურ გამოცდას საჭიროებს, რადგან შეიძლება ისეთი რისკის შემცველი იყოს, როგორზეც ჯერჯერობით წარმოდგენა არ გვაქვს“, - აცხადებენ ევროპელი მედიკოსები.

ჩინეთში წესები, რომლებიც გენმოდიფიცირებული პროდუქციის წარმოებას ეხება, არც ისე მკაცრია, ამიტომ მეცნიერები დედის რძესთან მეტ-ნაკლებად მიახლოებული, სრულფასოვანი შემცვლელის მოძიებაზე მუშაობას აგრძელებენ, მაგრამ ყველაზე მთავარი - დასთანხმდებიან თუ არა დედები შვილებისთვის კლონირებული ძროხის რძის მიცემას, ჯერჯერობით უცნობია.