სამედიცინო დიაგნოზის უცხოეთში გადაგზავნა - GPI ჰოლდინგის ახალი სადაზღვევო სერვისი

დაზღვეულებს საკუთარი სამედიცინო ისტორიის მსოფლიოს წამყვანი კლინიკების სპეციალისტებთან გადაგზავნა შეუძლიათ. საბოლოოდ კი, მათგან ინფორმაციას მიიღებენ თუ როგორ უნდა იმართოს დაავადება, რა გართულებებია მოსალოდნელი ან როგორი პროგნოზის გაკეთება შეიძლება.

ამ ახალ სერვისზე სასაუბროდ და მისი საფეხურების გასარკვევად, ჯიპიაის პარტნიორი კლინიკა „კურაციოს“ პირადი ექიმს - მაკა ოყროშიძეს გავესაუბრეთ:

- რამდენი კლინიკაა ჩართული საერთაშორისო კონსილიუმის ქსელში და როგორ ხდება პაციენტისთვის შესაბამისის შერჩევა?

საერთაშორისო ქსელში 100-ზე მეტი კლინიკაა ჩართული. მათი შერჩევა პაციენტის მდგომარეობაზეა დამოკიდებული. სამედიცინო ისტორიიდან გამომდინარე, "მედიგაიდ ინთერნეიშენალი" მომხმარებელს 3 წამყვან კლინიკას სთავაზობს , რომელიც განსაკუთრებით ცნობილია კონკრეტული მიმართულებით მკურნალობაში. შემდეგ, პაციენტი პირად ექიმთან ერთად იღებს გადაწყვეტილებას და ისინი ერთად არჩევენ სასურველ კლინიკას.

- რამდენად მნიშვნელოვანია ამ სერვისის დანერგვა საქართველოში?

ვფიქრობთ, რომ ეს კარგია არა მხოლოდ პაციენტებისთვის, ასევე ექიმებისთვისაც. საერთაშორისო კონსილიუმი იდეალური შესაძლებლობაა, რომ რთულ სიტუაციაში მოიძიო მეორე აზრი კონკრეტული დარგის საერთაშორისო სპეციალისტებთან. შესაბამისად, მიიღო ზუსტი ინფორმაცია და პაციენტი იყოს სწორად მართული, მისი ჯანმრთელობის მდგომარეობა კი გაუმჯობესდეს.

- როგორ მიმდინარეობს დიაგნოზის გადამოწმების სერვისი და რა საფეხურებს მოიცავს?

პირველ რიგში, პაციენტი საკუთარი სურვილით აკეთებს არჩევანს რომ მოიძიოს მეორე სამედიცინო აზრი. გვიკავშირდება, ვაცნობთ პირობებს და ვუხსნით ყველა აუცილებელ დეტალს. მან აუცილებლად უნდა მოაწეროს ხელი თანხმობის დოკუმენტს. ასე, ჩვენ საშუალება მოგვეცემა, რომ კონფიდენციალურობის დაცვით, ეს სამედიცინო ინფორმაცია განსახილველად კონკრეტულ კლინიკას მივაწოდოთ.

შემდეგ ვაგროვებთ სამედიცინო დოკუმენტაციას, ინსტრუმენტულ და ლაბორატორიულ კვლევების შედეგებს, რომლებიც შესაბამისი წესების დაცვით აიტვირთება საიტზე.

საბოლოოდ, იწყება ამ დოკუმენტაციის თარგმნა ინგლისურ ენაზე და განსახილველად პაციენტის მიერ შერჩეულ კლინიკას ეგზავნება. პაციენტი პასუხს 10 სამუშაო დღეში იღებს.

- დაეხმარება თუ არა საერთაშორისო კონსილიუმი ქართველ ექიმებს, რომ უკეთ გაიცნონ საერთაშორისო სამედიცინო პრინციპები და მიდგომები?

დღევანდელ ციფრულ ეპოქაში, სამედიცინო ინფორმაციაზე ხელმისაწვდომობა ძალიან გაზრდილია. ყველა ექიმს აქვს შესაძლებლობა, გაეცნოს სხვადასხვა ქვეყნის გაიდლაინებსა და პროტოკოლს.

ამის მიუხედავად, გარკვეულ სფეროში წამყვანი სპეციალისტის აზრის მოსმენა, მისი გამოცდილების გაზიარება, ვფიქრობ, ძალიან აუცილებელია ნებისმიერი ექიმისთვის.

- სულ ცოტა ხანია, რაც GPI დაზღვევას ეს სერვისი დაემატა. უკვე ისარგებლეს თუ არა პაციენტებმა საერთაშორისო კონსილიუმით და რამდენად დიდია მასზე მოთხოვნა?

მოთხოვნა საკმაოდ მაღალია - მას შემდეგ, რაც პაციენტებს აღნიშნული სერვისი გავაცანით, დიდი დაინტერესება გამოხატეს. ამჟამად უკვე მიიღეს პასუხები GPI-ს სადაზღვევო პაკეტით მოსარგებლე ადამიანებმა და საერთაშორისო სპეციალისტებთან ერთად, დეტალურად განვიხილეთ მათი შემთხვევები.