მსოფლიოს უდიდესი ქალაქები საკუთარი წონის გამო იძირებიან

აშშ-ის გეოლოგიური სამსახურის გეოფიზიკოსმა ტომ პარსონსმა იმის ილუსტრაციისთვის, როგორ „იძირებიან“ ქალაქები, სან ფრანცისკოს მაგალითი დაასახელა - ამის შესახებ Euronews წერს.

სან ფრანცისკოს ყურე, რომლის მოსახლეობა 7,7 მილიონზე მეტს შეადგენს, ჩრდილოეთ კალიფორნიის კულტურული, კომერციული და ფინანსური ცენტრია. პარსონსმა დაადგინა, რომ ურბანული განვითარების შემდეგ, დროთა განმავლობაში, ქალაქი მიწაში 8 სანტიმეტრით ჩავიდა. რეგიონის ზოგიერთ ნაწილში შედეგები კიდევ უფრო საგანგაშო იყო. გასული ათწლეულის განმავლობაში სან ფრანცისკოში, ათასწლეულის კოშკი 40 დუიმზე მეტად ჩაიძირა (1 დუიმი 25.4მმ)

ასეთი კვლევა მნიშვნელოვანია, რადგან ის ადასტურებს კლიმატის ცვლილების გავლენას ზღვის დონეზე. მეცნიერები აღნიშნავენ, რომ 2050 წლისთვის სან-ფრანცისკოს ყურეს არეალში ზღვის დონე 30 სანტიმეტრით აიწევს.

თითქმის შეუძლებელია ქალაქის ზუსტი წონის გამოთვლა, ამბობს ტომ პარსონსი, მაგრამ გარკვეული ფაქტორების საფუძველზე შეფასება შესაძლებელია.

გეოფიზიკოსის აზრით, სან-ფრანცისკოს შემთხვევაში ქალაქის წონის გაანგარიშება დასახლებული ტერიტორიების მიხედვით უნდა მოხდეს - საზოგადოებრივი შენობები, ავტოსადგომები, საცხოვრებელი და კომერციული შენობები, მსუბუქი და მძიმე მრეწველობა, საწყობები, მოსახლეობა.

პეტერსონის თქმით, ზესმოთ ჩამოთვლილმა ფაქტორებმა გლობალური დათბობის შედეგად, ზღვის დონის მატებასთან ერთად, შეიძლება წყალდიდობის რისკი გაზარდოს.

მეცნიერის გათვლით, სან ფრანცისკოს წონა, დაახლოებით, 1,6 ტრილიონი კილოგრამია, რაც 250 მილიონი სპილოს ეკვივალენტია და სრულიად საკმარისია, რომ ამ რეგიონში ლითოსფერო (დედამიწის ყველაზე მაგარი, გარე გარსი) „ჩატყდეს“.

ექსპერტი დასძენს, რომ მისი კვლევა შეიძლება, გამოყენებულ იქნეს მსოფლიოს ნებისმიერ ქალაქში და სან ფრანცისკოს მსგავსი საყურადღბო შედეგები ნებისმიერ დიდ ქალაქში მივიღოთ.

გეოფიზიკოსი აცხადებს, რომ წონის გარდა, გასათვალისწინებელია მიწის დაწევის სხვა მიზეზები, ტექტონიკური ფილისა და გრუნტის წყლების მოძრაობის ჩათვლით.

ამიერიდან მეცნიერები ზღვის დონის აწევის საფრთხეებზე მუშაობის დროს ქალაქის წონასაც გაითვალისწინებენ. მომავალში შესაძლებელი იქნება შედეგების გაუმჯობესება სატელიტური ფოტოების დამატებით, რათა შესწავილ იქნეს დედამიწის ზედაპირი და განისაზღვროს, რომელ რაიონებს ემუქრებათ მასშტაბური წყალდიდობები.

წყარო: www.euronews.com