რატომ არ იცვამდნენ შარვალს ძველ რომში?

რომაული მოდა ორივე სქესის წარმომადგენლებს ტუნიკას და ტოგას სთავაზობდა. პირველს ყოველდღიურ ცხოვრებაში იცვამდნენ, მეორეს კი განსაკუთრებული შემთხვევებისთვის ინახავდნენ.

რომის იმპერია, დაახლოებით, ხუთ მილიონ კვადრატულ კილომეტზე იყო გადაჭიმული. ამ უზარმაზარ ტერიტორიაზე ერთმანეთისგან სრულიად განსხვავებული კულტურის ადამიანები ცხოვრობდნენ და თითოეულს ჩაცმის საკუთარი სტილი ჰქონდა.

მაგალითად, ცხოველის ტყავისგან შეკერილი შარვლები ეცვათ იულიუს კეისრის მიერ დაპყრობილი ტომის მამაკაცებს - გალიელებს (თანამედროვე საფრანგეთის ტერიტორია) და გერმანელებს, რომლებსაც რომაელები ევროპის დაპყრობის დროს ებრძოდნენ. მათ „ბარბაროსებიც“ კი შეარქვეს. აღსანიშნავია, რომ თავდაპირველად ამ ძველი ბერძნული სიტყვით მოიხსენიებდნენ ყველას, ვინც ბერძნულად არ ლაპარაკობდა.

რომაელებისთვის შარვალი იმპერიასთან დაპირისპირებული, არაცივილიზებული ადამიანის სიმბოლოდ იქცა, მაგრამ დროთა განმავლობაში, შარვლის მიმართ დამოკიდებულება შეიცვალა.

ჩვენი წელთაღრიცხვით დაახლოებით 100 წელს შარვალი ჯერ კიდევ ბარბაროსების სამოსად ითვლებოდა, თუმცა, მალევე „შერისხული სამოსის“ ჩაცმა რომაელმა ჯარისკაცებმაც დაიწყეს. ეს იყო ძირითადად, მატყლის ქსოვილისგან შეკერილი სამოსი, რომელსაც რომაელი ჯარისკაცები ცივი კლიმატის ქვეყნებში ბრძოლის დროს იყენებდნენ. საბოლოოდ, შარვლის ტარება მოსახლეობაშიც გავრცელდა.

🔰

იმუნიტეტი - მართალია თუ არა, რომ ეს სიტყვა რომის იმპერიის მონებს უკავშირდება?