სენსაციური აღმოჩენა - ქალის კვერცხუჯრედი მამაკაცს ირჩევს

ცნობილია, რომ კვერცხუჯრედი განაყოფიერებამდე გამოიმუშავებს ნივთიერებას, რომელიც სპერმას იზიდავს. დიდი ბრიტანეთისა და შვედეთის მკვლევრებმა სცადეს გაერკვიათ, ერთნაირია თუ არა კვერცხუჯრედის „მიზიდულობის ძალა“ სხვადასხვა მამაკაცის სპერმისთვის.

სინჯარაში ჩატარებულმა ცდებმა დაადასტურა, რომ კვერცხუჯრედები ზოგ სპერმას იწონებენ და ზოგს იწუნებენ. უფრო მეტიც, თითოეულს საკუთარი გემოვნება აქვს.

„ცდის დროს გამოიკვეთა, რომ ერთი ქალის ფოლიკულური სითხე აქტიურად ცდილობდა ერთი მამაკაცის სპერმის მოზიდვას, ხოლო მეორე ქალის ფოლიკულური სითხე სხვა მამაკაცის სპერმის მოსაზიდად აქტიურობდა“, - განმარტავს სტატიის ავტორი, სტოკჰოლმის უნივერსიტეტის მკვლევარი ჯონ ფიცპატრიკი (John L. Fitzpatrick).

შეიძლება თუ არა, რომ „წუნია“ კვერცხუჯრედი კი არა, სპერმატოზოიდი აღმოჩნდეს?

ექსპერტები ფიქრობენ, რომ ეს ნაკლებად სავარაუდოა. საკუთარი გენების მომავალ თაობებზე გადაცემის თვალსაზრისით, მამაკაცისთვის რაც შეიძლება მეტი ქალის განაყოფიერება მოგებიანია. თუ მამაკაცი ერთგულებით არ გამოირჩევა, სხვადასხვა ქალისგან თითქმის შეუზღუდავი რაოდენობის შვილი შეიძლება ჰყავდეს (ზოგიერთ აღმოსავლელ მმართველს ასობით ჰყავდა). ამიტომ, სპერმას მიზეზი არ აქვს, უარი თქვას კვერცხუჯრედთან შერწყმაზე.

ხოლო, ქალს ძალიან ბევრი შვილის გაჩენა არ შეუძლია. ამიტომ ის ვალდებულია, აირჩიოს პარტნიორი, რომლის გენებსაც შთამომავლობას გადასცემს. როგორც ჩანს, ეს არჩევანი კვერცხუჯრედის დონეზეც კი კეთდება.

აღსანიშნავია, რომ რეპროდუქციული ორგანოს არჩევანი ხშირად თავად ქალის არჩევანს არ ემთხვევა, რაც ზოგ შემთხვევაში შეიძლება უშვილობის მიზეზი გახდეს. თუმცა, ეს საკითხი დამატებით კვლევას საჭიროებს.

ესეც საინტერესოა 🔰:

რატომ უჭირავს დედას ჩვილი უმეტესად მარცხენა ხელით?

დაიბადა ჩვილი, რომელიც დედაზე მხოლოდ 18 თვით პატარაა!

ქალი, რომელიც დნმ-ით საკუთარი შვილების დედა არ აღმოჩნდა