ბადრიჯნის რულეტების მოსამზადებლად საჭიროა:
ბადრიჯანი - 1 კგ;
ქათმის ფარში - 400 გრ;
ყველი - 200 გრ;
ნიორი - 4 კბილი;
ხახვი - 100 გრ;
ორეგანო - 1 ჩ/კ;
ოხრახუში - 100 გრ;
ზეთის ხილი - 20 გრ.
მომზადების წესი:
თავდაპირველად ბადრიჯნით დავიწყოთ:
გარეცხეთ ბადრიჯანი, მოაჭერით თავი და ბოლო, დაჭერით გრძლად, 2 მილიმეტრის სისქეზე. მოაყარეთ მარილი და მოათავსეთ საწურში ნახევარი საათით. შემდეგ საგულდაგულოდ გაწურეთ და გადაიტანეთ ცალკე ჯამზე.
ახლა რულეტის შიგთავსის მომზადებას შეუდექით:
გააცხელეთ ტაფა საშუალო ცეცხლზე, მოასხით ზეთი, მოთუშეთ წვრილად დაჭრილი ხახვი, დაამატეთ ქათმის ფარში, ორეგანო და ბოლოს - დაჭყლეტილი ნიორი. მოთუშვის პროცესში ხშირად ურიეთ. განაგრძეთ მოთუშვა, დაახლოებით, 5-6 წუთის განმავლობაში. შემდეგ გადაუწურეთ ცხიმი, გაგრილებულ ფარშს დაამატეთ გატარებული ოხრახუში, ძალიან წვრილად დაჭრილი ზეთის ხილი და გახეხილი ყველი.
დაბოლოს, რულეტების მომზადების დროც დადგა:
აიღეთ ერთი ნაჭერი ბადრიჯანი, გადაუსვით ცოტაოდენი ფარში და გადაახვიეთ. გადახვეულ ბადრიჯანს ჩაარჭვეთ კბილის ჩხირი. იმავე წესით განაგრძეთ რულეტების გადახვევა. როცა ამ პროცესს მორჩებით, გადახვეული ბადრიჯნები დააწყვეთ „ჟარონაზე“ და შედგით ღუმელში, რომელიც 170 გრადუსზე იქნება გაცხელებული. თუკი გრილის რეჟიმი გაქვთ, შეგიძლიათ გამოიყენოთ. დატოვეთ, დაახლოებით, 20 წუთით, სანამ ბადრიჯანი არ დარბილდება. შემდეგ კი ღუმელიდან გადმოიღეთ და გემრიელად მიირთვით.