საუკეთესო იტალიური ნაყინი „ჯელატო“ - მოამზადეთ სახლის პირობებში

საჭირო პროდუქტი:
რძე (3,5%) – 200 მლ.
ნაღები (33%) – 200 მლ.
შაქარი - 100 გრ.
კვერცხის გულები - 3 ცალი,
ვანილის  შაქარი - 10 გრ.

მომზადების წესი:

პატარა ქვაბში ჩაასხით რძე და ნაღები, დაუმატეთ შაქრის ნახევარი და ვანილი, კარგად მოურიეთ და დაბალ ცეცხლზე დადგით. როგორც კი ადუღებამდე მივა (არ უნდა ადუღდეს), ცეცხლიდან გადმოდგით და გააცივეთ.

სანამ რძე ცივდება, კვერცხის გულები და დარჩენილი შაქარი კარგად ათქვიფეთ. კვერცხიანი მასა გაცივებულ რძეში ჩაასხით და კიდევ კარგად ათქვიფეთ.

ქვაბი წყლის აბაზანაზე დადგით და დაბალ ცეცხლზე, განუწყვეტელი მორევით გააცხელეთ. დაახლოებით, 10-12 წუთში მასა გასქელდება, მაგრამ არავითარ შემთხვევაში არ უნდა ადუღდეს. ქვაბი ცხელი წყლიდან ამოიღეთ და ცივწყლიან ჯამში გადაიტანეთ.

გაცივებული მასა გასაყინ ფორმაში გადაიტანეთ და საყინულეში მოათავსეთ.
2 საათის შემდეგ ნაყინი გამოიღეთ, კარგად მოურიეთ და საყინულეში დააბრუნეთ.
იგივე პროცედურა ყოველ ნახევარ საათში უნდა გაიმეოროთ.
6 საათის შემდეგ თქვენ მიიღებთ ჰაეროვანი ნაღების ნაყინს, რომელიც შეგიძლიათ, გამდნარი შოკოლადით, გახეხილი თხილით ან ხილით გააფორმოთ.

გემრიელად მიირთვით!