ცნობილია, რომ მოცარტის საყვარელი საკვები კნედლიკი იყო (მოხარშული ცომის ან კარტოფილის ნაწარმი სხვადასხვა შიგთავსით).
ასე გაჩნდა კანფეტი მოცარტის კნედლიკი, რომლის რეცეპტსაც ქვემოთ შემოგთავაზებთ:
ინგრედიენტები:
კვერცხის გული - 2 ცალი,
ოთახის ტემპერატურის კარაქი - 75 გრ.
შაქარი - 3 ს/კ.
ფქვილი - 75 გრ (ნახ.ჭ)
ხაჭო - 250 გრ.
მანანის ბურღული - 20 გრ.(1 ს/კ.)
ლიმონის ცედრა - გემოვნებით
მომზადების წესი:
1. კვერცხის გულები და კარაქი ათქვიფეთ, სანამ ერთგვაროვან მასად იქცევა. დაუმატეთ შაქარი, ფქვილი, ხაჭო, მანანის ბურღული, ლიმონის ცედრა და მოზილეთ. შემდეგ გააბრტყელეთ, ამოჭერით რგოლები, თითოეული რგოლის ცენტრში დაადეთ შოკოლადის ტრიუფელი და შეკარით.
2. დიდ ქვაბში ჩაასხით წყალი, აადუღეთ და ცოტა მარილი დაუმატეთ. როცა წყალი ადუღდება, ცეცხლს დაუწიეთ და კანფეტები სათითაოდ წყალში ჩაუშვით. მომზადების დრო, დაახლოებით, 15-20 წუთია. გაითვალისწინეთ, რომ სანამ წყალში ყველა კანფეტს ჩაუშვებდეთ, ჯერ ერთი მოსინჯეთ. თუ გაიშალა, ცომში მეტი ფქვილი დაუმატეთ.
3. მზა კანფეტებს შაქრის პუდრა მოაფრქვიეთ და სუფრასთან თბილი მიიტანეთ.
შენიშვნა: მზა კანფეტები შეგიძლიათ, წვრილად დაჭრილ თხილში ან ქოქოსის ბურბუშელაში ამოავლოთ.
ამავე რეცეპტით შეგიძლიათ მოამზადოთ ხილის კნედლიკი, თუ გულსართში, ტრიუფელის ნაცვლად, ქლიავს, ატამს, მარწყვს ან სხვა ხილს გამოიყენებთ.