ბროკოლი თუ ყვავილოვანი კომბოსტო?

ადრე, მებაღეები თუ ფერმერები უპირატესობას თეთრთავიან კომბოსტოს ანიჭებდნენ - ბოსტნეულის მეფეს ვიტამინებისა და მინერალების ერთადერთ შეუცვლელ წყაროდ მიიჩნევდნენ. მაგრამ ის დრო წარსულს ჩაჰბარდა, რადგან დღეს უკვე გაირკვა, რომ არსებობს თითქმის 100 სახეობის კომბოსტო, რომლებიც გაცილებით სასარგებლოა, ვიდრე თეთრთავიანი: პეკინის, ბრიუსელის, წითელთავიანი, ბროკოლი, ფერადი კომბოსტო და სხვ. ამ სახეობებში ყველაზე გამორჩეულია კომბოსტოს ორი სახეობა - ბროკოლი და ყვავილოვანი კომბოსტო, რომელთა ერთმანეთისგან გარჩევა დიასახლისებს ხშირად უჭირთ, მიუხედავად იმისა, რომ ამ ორ ბოსტნეულს შორის უამრავი სხვაობაა, როგორც შემადგენლობაში, ისე, სასარგებლო თვისებებში, მომზადების წესებსა და ფერებშიც კი.

მაშ ასე, რომელი უფრო სასარგებლოა - ბროკოლი თუ ყვავილოვანი კომბოსტო?

ფაქტი 1.
ეს ორი სახეობა კარდინალურად განსხვავდება ფერებით. ყვავილოვან კომბოსტოს მოყვითალო და მომწვანო ფერები დაჰკრავს, ხოლო ბროკოლი ყოველთვის მწვანე ან იასამნისფერია.

ფაქტი 2.
ყვავილოვანი კომბოსტო უფრო კაპრიზულია, ვიდრე ბროკოლი. მას უყვარს ნესტი, მაგრამ არა ჭაობი, ხოლო მზის სითბოს ვერ ეგუება, თუმცა, მიწის ნათელ ნაწილში უფრო კომფორტულად და მოხერხებულად გრძნობს თავს. ბროკოლი საკმაოდ კარგად ეგუება ტემპერატურის ცვალებადობას, არ ითხოვს განსაკუთრებულ მოვლას და უყვარს სინესტე.

ფაქტი 3.
კომბოსტოს ორივე სახეობა სასარგებლოა ორგანიზმისთვის.
ყვავილოვანი კომბოსტო: ადვილი გადასამუშავებელია, ამიტომ საუკეთესო საკვებია მათთვის, ვისაც კუჭ-ნაწლავის დაავადებები აწუხებთ. აფერხებს კანის ანთებითი პროცესების განვითარებას. აძლიერებს ნაღვლის გამოყოფას, უზრუნველყოფს ნაწლავის რეგულარულ დაცლას. თუ რეგულარულად ჩართავთ რაციონში, მინიმუმამდე დაიყვანთ სარძევე ჯირკვლისა და პროსტატის კიბოს განვითარების რისკს. 
ბროკოლი: განსაკუთრებით რეკომენდებულია მათთვის, ვისაც გულის უკმარისობა და ნერვული სისტემის დარღვევა აქვთ. დადებითად მოქმედებს სისხლის შემადგენლობაზე, მიიჩნევა ერთ-ერთ საუკეთესო ანტისკლეროზულ საშუალებად. 

ფაქტი 4.
კომბოსტოს ორივე სახეობა იდეალურია ჭარბი წონის პრობლემის მოსაგვარებლად.

ფაქტი 5.
ყვავილოვანი კომბოსტო: თერმული დამუშავების შემდეგაც ინარჩუნებს ვიტამინების უმეტეს ნაწილს.
დიდი რაოდენობით კალიუმსა და კალცს შეიცავს.
ბროკოლი: ჰიპოალერგიულია. ასევე, მის შემადგენლობაშია ფოლიუმის მჟავა და ამიტომ განსაკუთრებით სასარგებლოა ორსულთათვის. შეგიძლიათ, მიირთვათ უმად. განსაკუთრებით სასარგებლოა უზმოზე.