რესტორან „თეთრი სახლის“ საფირმო ხაჭაპური

ექვსნაჭრიანი ხაჭაპურისთვის საჭიროა:
500 გრ. თეთრი პურის ფქვილი;
1 ჩაის კოვზი საფუარი;
400 გრამი გახეხილი იმერული ყველი;
1 მთლიანი კვერცხი და 1 კვერცხის ცილა;
6 ნაჭერი ნაკლებად მარილიანი,  რბილი სულგუნი.

მომზადების წესი:
საშუალო ზომის ჯამში ვყრით პურის ფქვილს. მეორე ჯამში ჩავასხამთ, დაახლოებით, ერთ ჭიქა თბილ წყალს და გავხსნით საფუარს. საფუარიან წყალს  დავასხამთ ფქვილზე, თუ საჭიროებს, წყალს დავამატებთ. მოვზელთ რბილ ცომს. 15-20 წუთით დავდგამთ თბილ ადგილას და ხაჭაპურის ცომი მზადაა.
სასურველია, რომ უკვე ამოსული ცომი ზეთში დასველებული ხელით ჩავზილოთ, რადგან ცომი უფრო ფაფუკი და ჰაეროვანი გამოვიდეს.
ცომის ამოსვლამდე, სახეხზე გავხეხოთ ნაკლებად მარილიანი იმერული ყველი, დავამატოთ ერთი კვერცხის ცილა, კარგად ავურიოთ და გავაკეთოთ ყველის გუნდა.  
ამოსული ცომი ჯამიდან ფიცარზე გადმოვიღოთ,ზედ დავდოთ ყველის გულსართი და მოვახვიოთ. ხელის მოძრაობით ყველი ხაჭაპურში თანაბრად გადავანაწილოთ და გავაბრტყელოთ.
ამის შემდეგ, მომცრო ზომის ჯამში მოვამზადოთ ხაჭაპურის თავზე გადასასმელი განსაკუთრებული ნაზავი, რომელიც ჩვენს ხაჭაპურს განუმეორებელ გემოსა და ჰაეროვნებას შემატებს:
1 ცალი კვერცხი ავთქვიფოთ, დავამატოთ 1 სუფრის კოვზი მაიონეზი, ისევ ავთქვიფოთ და დავამატოთ 100 გრამი გახეხილი ყველი.
გამზადებული ნაზავი თავზე გადავუსვათ გაბრტყელებულ ხაჭაპურს და ზედ ლამაზად მოვალაგოთ თხლად დაჭრილი სულგუნის ნაჭრები.
გაცხელებულ ღუმელში შედგმიდან, დაახლოებით, 10 წუთში ჩვენი საფირმო ხაჭაპური მზადაა.

შენიშვნა:
სულგუნის ნაჭერი იმდენი დაგჭირდებათ, რამდენნაჭრიან ხაჭაპურსაც აცხობთ.
ძალიან რომ არ გაიშალოს, სულგუნი ხაჭაპურზე მოწყობის წინ პურის ფქვილში უნდა ამოავლოთ.
ხაჭაპურის მომზადებას, დაახლოებით, 40 წუთი დასჭირდება.

გემრიელად მიირთვით!