კროასანები ჯემის, შოკოლადის, კრემისა და ნაყინის გულსართით

უგემრიელესი კროასანების რეცეპტი ჰიპერმარკეტ „გუდვილის“ ტექნოლოგმა ექსკლუზიურად, „FunTime“-ის მკითხველისთვის მოგვაწოდა.

ცომის შემადგენლობა და მომზადება:
ფქვილი 1 კგ.
მარილი 15 გრ.
შაქარი 120 გრ.
საფუარი 30 გრ.
რძე 500 გრ.
კარაქი (ან მარგარინი) 400 გრ.

კარაქის გარდა, ყველა ინგრედიენტი მოათავსეთ მიქსერში და დაბალ სიჩქარეზე, 5 წუთის განმავლობაში ზილეთ, სანამ მასა ერთგვაროვანი არ გახდება. ამის შემდეგ კი მიქსერის სიჩქარეს მოუმატეთ. ცომი 10 წუთის განმავლობაში ზილეთ. ცომი პრიალა და მოქნილი გახდება. ამის შემდეგ, მინიმუმ  30 წუთით მაცივარში შეინახეთ.  
მაცივრიდან გამოღების შემდეგ, დაახლოებით, 1 სმ-ის სისქეზე გააბრტყელეთ და შუაგულში გაბრტყელებული კარაქი ჩაუდეთ. კროასანის ცომის დაფენოვანება ისევე ხდება, როგორც ნებისმიერი ფენოვანი ცომის.
დაფენოვანებული ცომი კონვერტისებურად გადაკეცეთ და ნახევარი საათით ისევ მაცივარში შეინახეთ.
პროცესის დასასრულ, ცომი 0,5 სმ-ზე გააბრტყელეთ და სამკუთხედებად დაჭერით.
გულსართის შერჩევა დიასახლისის გემოვნებასა და ფანტაზიაზეა დამოკიდებული. შეგიძლიათ, გულსართად ჯემი, თერმოსტაბილური შოკოლადის ჩხირები (რომლებიც ღუმელში ცხობას უძლებს) ან კრემი გამოიყენოთ.
ცომზე გულსართის მოთავსების შემდეგ სამკუთხედები სქელი ბოლოდან წვრილისკენ დაახვიეთ და ათქვეფილი კვერცხის გული გადაუსვით.
ცხობისთვის გამზადებული კროასანები ოთახის ტემპერატურაზე, 15-20 წუთით გააჩერეთ, შემდეგ კი 180 გრადუსზე გამოაცხვეთ, სანამ ოქროსფერი არ გახდება.

შენიშვნა:
კროასანი მარგარინზეც მზადდება, მაგრამ კარაქზე მომზადებულს უკეთესი, სასიამოვნო გემო და ხრაშუნა ქერქი აქვს.
კროასანის კარაქი და ცომი აუცილებლად ერთი ტემპერატურის უნდა იყოს.
კროასანების გამოცხობა გულსართის გარეშეც შეგიძლიათ. შეგიძლიათ, უკვე გამომცხვარ ნამცხვარში კრემი ან ნაყინი კულინარიული პარკით შეუშვათ ან გაჭრათ და ისე მოათავსოთ.

გემრიელად მიირთვით.