შემწვარი კალმახი ბროწეულის სოუსით რესტორან „შატროს“ მზარეულ დავით გიორგბერიძის რეცეპტით.
კერძის მოსამზადებლად საჭირო ინგრედიენტები:
კალმახი - 250 გრ.
პურის ან კარტოფილის ფქვილი - 20 გრ.
ზეთი - 60 გრ.
კარტოფილის ფქვილი - 1 ჩაის კოვზი.
კამა - 50 გრ.
ხახვი - 50 გრ.
შავი პილპილი - გემოვნებით.
ლიმონის წვენი - 20-30 გრ.
ბროწეულის წვენი - 150 გრ.
მომზადების წესი:
გარეცხილ კალმახს შეძლებისდაგვარად მოაშორეთ ფხები (ძირითადად, ხერხემალი).
გადახსენით თევზი შუაზე, კარგად ამოავლეთ მარილგარეულ პურის ფქვილში და დადეთ გაცხელებულ ზეთიან ტაფაზე.
შეწვით ორივე მხრიდან, გადმოიღეთ თეფშზე და ახლა სოუსის მომზადებას შეუდექით.
სოუსის მომზადების წესი:
წვრილად დაჭრილი ხახვი მოთუშეთ ტაფაზე (სასურველია, ოდნავ ღრმა ტაფა აირჩიოთ).
დაასხით ტაფაზე ბროწეულის წვენი.
როგორც კი წამოდუღდება, შეასქელეთ პურის ფქვილით, ისე, რომ სოუსი საშუალო სისქის გამოვიდეს.
ბოლოს კი დაამატეთ წვრილად დაჭრილი კამა.
ადუღეთ ისევ, დაახლოებით, 5 წუთი და გაზქურა გამორთეთ.
მომზადებული სოუსი შემწვარ კალმახს მოასხით.
ზედ დაადეთ რამდენიმე ნაჭერი წვრილად დაჭრილი ლიმონი და გემრიელად მიირთვით!
შენიშვნა:
მომზადებულ სოუსს შეგიძლიათ, 20-30 გრამი კონიაკი დაუმატოთ. ეს მას განსაკუთრებულ გემოს შესძენს.
შეგიძლიათ, თეფშზე ჯერ სოუსი მოასხათ და შემდეგ ზედ დაადოთ შემწვარი კალმახი. ეს უკვე, თქვენი გემოვნების მიხედვით.
ამ უგემრიელესი კერძის მოსამზადებლად, დაახლოებით, 20 წუთი და 5 ლარი დაგჭირდებათ.
ფოტოგრაფი: ნინი მანდარია
