თავისუფლების მოედნის N4-ში მდებარე საკონდიტრო „lik @ nik“-ის გამოცდილმა კონდიტერმა დოდო ებანოიძემ ტორტის რეცეპტი ექსკლუზიურად „Funtime“-ის მკითხველებისთვის გაგვიზიარა.
ტორტი სამი ფენისგან შედგება, ესენია: თეთრი ბისკვიტი, შავი ბისკვიტი და სუფლე.
მაშ ასე, მოიმარაგეთ ინგრედიენტები და საქმეს შეუდექით.
თეთრი ბისკვიტის ინგრედიენტები და მომზადების წესი:
კვერცხი - 4 ცალი
შაქარი - 4 სუფრის კოვზი
ფქვილი - 4 სუფრის კოვზი
ხსნადი ყავა - 1 სუფრის კოვზი
ვანილი
კვერცხის ცილები და გულები გააცალკევეთ.
გულები შეინახეთ, ცილოვანი მასა კი ღრუბლის კონსისტენციამდე ათქვიფეთ.
როცა ბეზე კარგად გამაგრდება, გულები სათითაოდ შეათქვიფეთ.
გამზადებულ მასას თითო კოვზობით დაუმატეთ გაცრილ ფქვილთან შერეული ყავა და ვანილი.
ხის კოვზით ფაქიზად აურიეთ და ცხიმწასმულ კალკაზე დაასხით.
ზომიერ ცეცხლზე ბისკვიტის გამოცხობას, დაახლოებით, 10-15 წუთი დასჭირდება.
შავი ბისკვიტის ინგრედიენტები და მომზადების წესი:
შავი ბისკვიტის ინგრედიენტები და მომზადების წესი ზუსტად ისეთივეა, რაც თეთრის შემთხვევაში, მხოლოდ ერთი განსხვავებით - 1 სუფრის კოვზი ხსნადი ყავის ნაცვლად, 1 სუფრის კოვზი კაკაო უნდა დაუმატოთ.
ყავის სუფლეს ინგრედიენტები და მომზადების წესი:
კვერცხის ცილა - 4 კვერცხის
შაქარი - 300 გრ.
ლიმონმჟავა - ნახ. ჩაის კოვზი
ხსნადი ყავა - 1 სუფრის კოვზი
ჟელატინი - 1 ჩაის კოვზი
ჟელატინი 2 სუფრის კოვზ თბილ წყალში 20 წუთით დაალბეთ.
სანამ ჟელატინი დალბება, ცეცხლზე წყლიანი ქვაბი დადგით.
წყალი რომ ადუღდება, ქვაბში ჩადგით ჯამი, რომელშიც კვერცხის ცილა, შაქარი და ლიმონმჟავაა მოთავსებული და დაიწყეთ თქვეფა.
გაითვალისწინეთ, რომ ჯამი წყალს არ უნდა ეხებოდეს.
როცა ცილოვანი მასა მყარი ღრუბლის კონსისტენციამდე მივა, დაუმატეთ ხსნადი ყავა, ერთი-ორი წუთი კიდევ თქვიფეთ და ქვაბიდან გადმოდგით.
დამბალი ჟელატინი დაბალ ცეცხლზე გააცხელეთ, ოღონდ არავითარ შემთხვევაში არ აადუღოთ და მოხარშულ ბეზეს დაასხით. ხის კოვზით ფაქიზად მოურიეთ, კალკაზე გადმოასხით და მაცივარში შედგით. სუფლეს გამაგრებას დაახლოებით 1 საათი სჭირდება.
კრემის ინგრედიენტები და მომზადების წესი:
წყალი - 1 ლიტრი
ფქვილი - 1 ჭიქა
შაქარი - 1 ჭიქა
კარაქი - 200 გრ.
ყავა - 1 სუფრის კოვზი
ვანილი - დანის წვერით
ფქვილი და შაქარი ერთმანეთში კარგად აურიეთ.
ნელ-ნელა დაასხით წყალი და კრემი შეუჩერებელი მორევით მოადუღეთ.
წამოდუღებიდან 2-3 წუთში ქვაბი ცეცხლიდან გადმოდგით და კრემი გააგრილეთ.
გაციებულს შეათქვიფეთ კარაქი, ყავა და ვანილი.
ტორტის „აწყობა“:
თეთრ ბისკვიტს წაუსვით კრემი და დაადეთ სუფლეს ფენა.
ამის შემდეგ კრემი სუფლესაც წაუსვით და თავზე შავი ბისკვიტი დაადეთ.
მზა ტორტს კრემი თავზე და გვერდებზე კარგად წაუსვით და თქვენი სურვილისა და ფანტაზიის მიხედვით გააფორმეთ. შეგიძლიათ, ფენებს შორის კენკრა მოაყაროთ, თავზე კი გამდნარი შოკოლადი, ჟელე, მორჩენილი კრემი ან, სულაც, სუფლე გადაუსვათ.
გემრიელად მიირთვით!