ამ მარტივად მოსამზადებელი ვაშლის ნამცხვრის რეცეპტს ექსკლუზიურად „funtime“-ის მკითხველებს გურამიშვილის #33ა-ში მდებარე საცხობის „ნითას“ გამოცდილი კულინარი გიზიარებთ.
საჭირო პროდუქტი:
ფქვილი - 200 გრ
კვერცხი - 2
მაწონი - 250 გრ.
შაქარი - 200 გრ.
სოდა - 1 ჩაის კოვზი
ზეთი - 100 გრ.
ვანილი
მწიკვი მარილი
2-3 ვაშლი
გახეხილი ლიმონი.
მომზადების წესი:
თხელკანიანი ვაშლი გარეცხეთ, კანი გააცალეთ და გახეხეთ.
დაუმატეთ კანიანად გახეხილი ლიმონი და აურიეთ.
ცალკე ჯამში კარგად ათქვიფეთ კვერცხი და შაქარი.
თქვეფის პროცესში დაუმატეთ მაწონი, რომელშიც არეულია სოდა, ზეთი, ვანილი, მარილი და ბოლოს ფქვილი.
მიიღებთ, დაახლოებით, არაჟნის სისქის ცომს, რომელიც ცხიმწასმულ ფორმაში უნდა მოათავსოთ და თავზე ვაშლისა და ლიმონის ნაზავი გადაუსვათ (შეგიძლიათ, ვაშლი სხვა ხილით ან ხილფაფითაც ჩაანაცვლოთ). ვიდრე ფორმაში ჩაასხამთ, დაახლოებით, 2-3 სუფრის კოვზი ცომი მოიტოვეთ და 1-2 სუფრის კოვზი მაწვნითა და ცოტაოდენი ზეთით გაათხელეთ.
ეს თხელი ცომი თავზე მოასხით გამზადებულ „პეროგს“, შაქარი მოაყარეთ და წინასწარ გაცხელებულ ჰაერღუმელში შედგით.
ცხვება ზომიერ ცეცხლზე, დაახლოებით, 30 წუთის განმავლობაში.
შენიშვნა:
ამ ნამცხვრისთვის საჭირო პროდუქტების შეძენაზე, დაახლოებით, სამი ლარი დაგეხარჯებათ.
გემრიელად მიირთვით!