კუბდარი - სვანური დელიკატესის განსხვავებული რეცეპტი

ამ რეცეპტს გურამიშვილის N33ა-ში მდებარე საცხობ „ნითას“ გამოცდილი კულინარი გიზიარებთ.

კუბდარის მოსამზადებლად საჭირო ინგრედიენტები:
1 კგ პურის ფქვილით მოზელილი ცომი;
საქონლის ხორცი - 1 კგ;
ხახვი - 200 გრ;
ძირა - 1 ჩ/კ;
უცხო სუნელი - 1ჩ/კ;
ხმელი ქინძი - ნახევარი ჩ/კ;
წიწაკა - 1 ჩ/კ;
მარილი - 2 ჩ/კ.

მომზადების წესი:
წვრილად დაჭრილ ხორცს დაამატეთ, ასევე, წვრილად დაჭრილი ხახვი, ძირა, უცხო სუნელი, ხმელი ქინძი, წიწაკა და მარილი.
მიღებული მასა კარგად გადაურიეთ ერთმანეთში და დააბასტურმეთ.
დატოვეთ მაცივარში ერთი დღის განმავლობაში.

ჩაყარეთ ჯამში 1 კგ პურის ფქვილი, დაამატეთ 2 ჩაის კოვზი მშრალი საფუარი, 2 ჩაის კოვზი მარილი, 1 ჩაის კოვზი შაქარი, 2 სუფრის კოვზი ზეთი. დაამატეთ 700 გრამი თბილი წყალი და შეუდექით ცომის მოზელას.
როგორც კი ცომი აფუვდება და გამზადდება, მაგიდაზე მოაყარეთ ცოტაოდენი ფქვილი, დაყავით ცომი გუნდებად და გააბრტყელეთ.
მაცივრიდან გამოიღეთ დაბასტურმებული ხორცი, მოათავსეთ გაბრტყელებულ ცომში, მოუკარით თავი და ისევ ფრთხილად გააბრტყელეთ (უმჯობესია, ხელით, ისე რომ ცომი არ გაიხსნას).
იმისთვის, რომ ცხობის დროს ცომი არ გაიბეროს, გაბრტყელების შემდეგ ცომის თავი ოდნავ გახსენით. ბოლოს, მოათავსეთ ღუმელში და გამოაცხვეთ საშუალო ცეცხლზე, რათა ცომში მოთავსებული ხორცი კარგად ჩაიშუშოს.
როგორც კი კუბდარის ზედაპირი კარგად მოიბრაწება, ღუმელიდან გადმოიღეთ.
დაჭერით და გემრიელად მიირთვით.

შენიშვნა:
თუკი ხორცი ნაკლებად ცხიმიანია, შეგიძლიათ, ცოტაოდენი ზეთი დაამატოთ.
გაითვალისწინეთ, რომ კუბდარის გულსართი აუცილებლად კარგად უნდა იყოს დაბასტურმებული.
კუბდარის ცომი შედარებით მაგარი უნდა იყოს, ვიდრე, ხაჭაპურის.
მოზელილი ცომი დიდხანს არ გააჩეროთ. აფუების შემდეგ მალევე გამოაცხვეთ.
1 კილო ხორცისგან, დაახლოებით, 7-8 ცალი საშუალო ზომის კუბდარი გამოცხვება.
ამ უგემრიელესი, სვანური დელიკატესის მოსამზადებლად, საშუალოდ, 15 ლარი დაგეხარჯებათ.

ფოტოგრაფი: ნინუცა მანდარია