„სტეიკ-სალათი“ - კერძი გურმანებისთვის

„სტეიკის“ რეცეპტს რესტორან „შატროს“ ევროპული სამზარეულოს მზარეული ალექსანდრე კოშკელოვი გვიზიარებს.

1 ულუფა „სტეიკის“ მოსამზადებლად საჭირო მასალა:
სალათის ფურცლები - 60 გრ;
წითელი ხახვი - 1 თავი;
წითელი და მწვანე ბულგარული წიწაკა - 15 გრ;
მწვანე და შავი ზეთისხილი - 30 გრ;
სტაფილო - 20 გრ;
ზეითუნის ზეთი - 10 გრ;
ბალზამიკო - 5 გრ;
როზმარინი - ნახევარი ჩაის კოვზი;
ბოლის ესენცია - 5 გრ;
კარტოფილი - 40 გრ;
კიტრი - 50 გრ;
ძროხის (ან ხბოს) ხორცი (რბილი ნაწილი) - 120 გრ;

მომზადების წესი:
ძროხის ან ხბოს ხორცი რამდენიმე ნაწილად დაჭერით.
ტაფას მოასხით ზეთი, აცადეთ, კარგად გაცხელდეს და შემდეგ დააყარეთ დაჭრილი ხორცი. მოაყარეთ პილპილის მიქსი (შერეული პილპილი) და მარილი. 
ხორცი შეწვით ისე, რომ შეწვის პროცესი ბოლომდე არ მიიყვანოთ (დაახლოებით, 7 წუთი).
შემწვარი ხორცი გადაიტანეთ ჯამში.
სანამ ბოსტნეულის დაჭრას დაიწყებთ, დაჭერით კარტოფილი მრგვალად, მოაყარეთ ოდნავ მარილი და შეწვით ორივე მხრიდან. ახლა კი, ნელ-ნელა დანარჩენი ინგრედიენტების დამატებას შეუდექით.
ხორციან ჯამში ჩაამატეთ:
დაწეწილი სალათის ფურცლები; საშუალო ზომაზე დაჭრილი წითელი და მწვანე ბულგარული წიწაკა; თხლად და მრგვალ ნაჭრებად დაჭრილი სტაფილო; წვრილად დაჭრილი ხახვი და კიტრი. დაამატეთ, ასევე, მწვანე და შავი ზეთისხილი. მოასხით სპეციალური სოუსი (რომლის მომზადების წესს ქვემოთ გაგაცნობთ) და კარგად ამოურიეთ. 

სპეციალური სოუსის მომზადების წესი:
10 გრამ ზეითუნის ზეთს დაამატეთ 5 გრამი ბალზამიკო, ნახევარი ჩაის კოვზი როზმარინი და 5 გრამი ბოლის ესენცია. კარგად მოურიეთ და უგემრიელესი სოუსი მზად არის.

დაბოლოს:
სალათი გადაიტანეთ მოზრდილ თეფშზე. გვერდებზე მოუწყვეთ შემწვარი კარტოფილის ნაჭრები და მოაყარეთ სეზამის მარცვალი.
უგემრიელესი და არომატული „სტეიკი“ მზად არის. 

შენიშვნა: „სტეიკის“ მოსამზადებლად სულ 20 წუთი დაგჭირდებათ.
კარტოფილი შეგიძლიათ, შეწვათ ან ღუმელში გამოაცხოთ. ეს მხოლოდ და მხოლოდ თქვენს სურვილსა და გემოვნებაზეა დამოკიდებული.
არ არის აუცილებელი, კარტოფილი მრგვალად დაჭრათ. თუკი გირჩევნიათ, დაჭერით გრძლად და თხლად.

გემრიელად მიირთვით!

ფოტოგრაფი: ნინუცა მანდარია