გურული ღვეზელის რეცეპტი რესტორან „შატროს“ მზარეულმა ნანა გეწაძემ შემოგვთავაზა.
გურული ღვეზელის გამოსაცხობად საჭირო მასალა:
პურის ფქვილი - 1კგ.
იმერული ყველი - 600 გრ;
კვერცხი - 12 ცალი.
ცომის მომზადების წესი:
გურული ღვეზელების გამოსაცხობად იგივე ცომი იზილება, რაც იმერული ხაჭაპურისთვის.
ჯამში ჩაყარეთ 1 კგ. პურის ფქვილი, დაამატეთ 2 ჩაის კოვზი მშრალი საფუარი, 2 ჩაის კოვზი მარილი, 1 ჩაის კოვზი შაქარი, 2 სუფრის კოვზი ზეთი. დაასხით 700 გრამი თბილი წყალი და შეუდექით ცომის მოზელას. როგორც კი ცომი აფუვდება და გამზადდება, მაგიდაზე მოაყარეთ ცოტაოდენი ფქვილი, დაყავით ცომი გუნდებად და გააბრტყელეთ.
გამოცხობის წესი:
გაბრტყელებულ ცომს მიეცით მრგვალი ფორმა.
ცომის ნახევარ მხარეზე მოათავსეთ გახეხილი ყველი და ზემოდან დააჭერით 1 ცალი მოხარშული კვერცხი. გადაკეცეთ ცომი ისე, რომ მისცეთ ნახევარმთვარის ფორმა და გვერდები ნაზად შეუკეცეთ.
პატარა ჯამში ათქვიფეთ ერთი ცალი კვერცხი, დაასხით სულ ცოტა წყალი, კარგად გადაურიეთ ერთმანეთში და გამოსაცხობად გამზადებულ გურულ ღვეზელს ზემოდან ფუნჯით გადაუსვით.
ბოლოს კი შედგით 300 გრადუსზე გაცხელებულ ღუმელში 7-10 წუთით.
შენიშვნა:
თუ გსურთ, ცომი უფრო ფაფუკი და ჰაეროვანი გამოგივიდეთ, უკვე ამოსული ცომი ჩაზილეთ ზეთში ამოვლებული ხელებით.
გამოსაცხობად გამზადებული გურული ღვეზელები შუა ადგილზე ოდნავ დასერეთ, რათა ცხობის დროს ცომი არ გაიბეროს.
1 კგ. პურის ფქვილით მოზელილი ცომისგან, დაახლოებით, 10-12 ცალი გურული ღვეზელი გამოგივათ.
გემრიელად მიირთვით!
ფოტოგრაფი: ნინუცა მანდარია