ვაშლის შტრუდელი თაფლით, ნიგვზითა და ქიშმიშით

შტრუდელისთვის დაგჭირდებათ პიცის ცომი ან ნებისმიერი ფენოვანი ცომი, რომელიც სუპერმარკეტებშიც იყიდება და სახლშიც შეიძლება მოამზადოთ.
გაითვალისწინეთ, რომ შტრუდელისთვის ხაჭაპურის ცომი არ გამოდგება, რადგან ძალიან ნაზია და შეიძლება, ვაშლის შიგთავსმა გახეთქოს. შტრუდელში კი მთავარია, შიგთავსის უგემრიელესი წვენი ნამცხვრის გარეთ არ გამოვიდეს. ფენოვანი ცომი შიგთავსის წვენს არ გამოატარებს და ყველაფერს შიგნით დატოვებს.
შტრუდელისთვის ვაშლი აუცილებლად მომჟავო უნდა იყოს. ამიტომ, სასურველია, ნამცხვრისთვის მწვანე ვაშლი ან, უკიდურეს შემთხვევაში, ანტონოვკა შეარჩიოთ.

შტრუდელის შიგთავსისთვის საჭიროა:
ვაშლი - 1 კგ.
წვრილად დაჭრილი ან გატარებული ნიგოზი - 100-120 გრ.
თაფლი - 100-150 გრ. (დაახლოებით, 2 სუფრის კოვზი);
ქიშმიში - 100-120 გრ.
დარიჩინი - 1 ჩაის კოვზი;
შაქრის პუდრა - 2 სუფრის კოვზი.

მომზადების წესი:
გაფცქვნილი და წვრილ კუბიკებად დაჭრილი ვაშლი ჩაყარეთ ჯამში.
დაუმატეთ თაფლი, ქიშმიში, ნიგოზი, დარიჩინი, შაქრის პუდრა და კარგად აურიეთ.
ცომი უნდა გააბრტყელოთ ძალიან თხლად და კვადრატულად გაშალოთ.
კარგი იქნება, თუ გაბრტყელებულ ცომს სუფთა ნაჭერზე გაშლით, რაც მის შეკვრას გაგიადვილებთ. გაბრტყელებულ ცომზე შიგთავსი ერთიან მასად უნდა მოათავსოთ.
რულეტივით გადახვევა საჭირო არ არის.
ტილოს კიდეებში მოკიდეთ ხელი და ცომი შეკარით. აუცილებლად უნდა შეკრათ ცომის გვერდებიც. ნამცხვარი ჰაერღუმელის თუნუქის ფურცელზე გადაიტანეთ.
შტრუდელი 150-160 გრადუსზე 40 წუთის-1 საათის განმავლობაში ცხვება.
სასურველია, ცხობის პროცესში პერიოდულად ზეითუნის ზეთი ან თუნუქის ფურცელზე გადმოსული წვენი გადაუსვათ. ასე ნამცხვარი რბილი გამოვა.
გამომცხვარ შტრუდელს შაქრის პუდრა მოაყარეთ და თუ მარხვაზე არ ბრძანდებით, ნაყინთან ერთად მიირთვით.
თუ გსურთ, შტრუდელის გემო და არომატი კარგად შეიგრძნოთ, ნამცხვარი აუცილებლად ცხელი უნდა მიირთვათ.  
გაციებული შტრუდელი შეგიძლიათ, მიკროტალღურ ან ჩვეულებრივ ღუმელში გააცხელოთ.

გემრიელად მირთვით!

ფოტოგრაფი ნინუცა მანდარია.