გამომცხვარი კალმახის რეცეპტს რესტორან „შატროს“ ევროპული სამზარეულოს მზარეული ალექსანდრე კოშკელოვი გვიზიარებს.
1 ულუფა გამომცხვარი კალმახის მოსამზადებლად საჭიროა:
კალმახი - 1 ცალი;
ნიორი - 2 კბილი;
ოხრახუში 3-4 ღერი;
მარილი და შავი პილპილი - გემოვნებით;
ლიმონი - ნახევარი;
თხევადი ბოლის ესენცია - 1 ჩაის კოვზი.
გარნირის მოსამზადებლად დაგჭირდებათ:
ყაბაყი - 30 გრ;
სტაფილო - 30 გრ;
ბროკოლი - 50 გრ;
წითელი და მწვანე ბულგარული წიწაკა - 40 გრ;
ქამა სოკო - 60 გრ;
ორეგანო (თავშავა) - ნახევარი ჩაის კოვზი.
მომზადების წესი:
აარჩიეთ საშუალო ზომის კალმახი და კარგად გაასუფთავეთ.
შუაზე გაჭრილ კალმახს გამოაცალეთ ფხა და მოათავსეთ ფოლგაზე.
გაჭრილი თევზის შუაგულში მოათავსეთ შუაზე გაჭრილი ნიორი და ოხრახუში (დაუჭრელად).
დაამარილეთ, მოაყარეთ შავი პილპილი, ზემოდან მოასხით ლიმონის წვენი და ბოლის ესენცია.
კალმახი კარგად შეფუთეთ ფოლგაში და 170 გრადუსზე გაცხელებულ ღუმელში შედგით.
დაახლოებით, 12 წუთის შემდეგ გამოიღეთ თევზი ღუმელიდან, გახსენით ფოლგა, თევზის შუაგულიდან ამოიღეთ ნიორი და ოხრახუში, გამომცხვარი კალმახი გადაიტანეთ ცალკე თეფშზე და ახლა გარნირის მომზადებას შეუდექით.
კარგად გარეცხილი და დაჭრილი ბოსტნეული (ყაბაყი, სტაფილო, ბროკოლი, წითელი და მწვანე ბულგარული წიწაკა, ქამა სოკო) მოშუშეთ ზეთში, დაამატეთ მარილი, დაჭყლეტილი ნიორი და ნახევარი ჩაის კოვზი ორეგანო.
თეფშზე მოთავსებულ კალმახს გვერდით მოუწყვეთ მოთუშული ბოსტნეული.
შენიშვნა:
თუკი შებოლილი არომატი ან გემო არ მოგწონთ, შეგიძლიათ, ბოლის ესენციის ნაცვლად, გაჭრილ თევზში მრგვლად დაჭრილი პომიდორი მოათავსოთ.
თუკი ღუმელიდან თევზის გამოღების შემდეგ შეამჩნევთ, რომ თევზი ჯერ კარგად არ არის გამომცხვარი, კვლავ გადაახვიეთ ფოლგაში და გააგრძელეთ მისი გამოცხობა კიდევ რამდენიმე წუთით.
ორეგანოს ქართულად თავშავას უწოდებენ, რომელიც საქართველოში, ძირითადად, იმპორტირებული მშრალი სუნელის სახით იყიდება. მაღაზიებში მისი მოძებნა „ორეგანოს“ სახელწოდებით უფრო გაგიადვილდებათ.
გემრიელად მიირთვით!
ფოტოგრაფი: ნინუცა მანდარია