გებჟალია - მეგრული სამზარეულოს გამორჩეული კერძი

გებჟალიას რეცეპტს რესტორან „შატროს" გამოცდილი მზარეული დავით გიორგბერიძე გვთავაზობს. 

გებჟალიას მოსამზადებლად საჭირო ინგრედიენტები:
სულგუნი - 300 გრამი;
ნადუღი - 200 გრამი;
დანაყული პიტნა - 50 გრამი;
მარილი - გემოვნებით.

მომზადების წესი:
გებჟალიას მოსამზადებლად, უმჯობესია, სქელძირიანი ქვაბი შეარჩიოთ. ჩაასხით ქვაბში წყალი და აადუღეთ. სანამ წყალი წამოდუღდება, დაჭერით სულგუნი, მაქსიმალურად, თხელ ნაჭრებად, შემდეგ კი სულგუნის ნაჭრები ადუღებულ წყალში, ნელ-ნელა ჩაუშვით. ცეცხლს ოდნავ დაუწიეთ, მოიმარჯვეთ ხის კოვზი და დაიწყეთ ქვაბში ყველის მორევა. თანდათანობით შეამჩნევთ, რომ ყველის ნაჭრები ერთმანეთში შეერთდა. როგორც კი ერთგვაროვან მასას მიიღებთ და სულგუნის ზედაპირი პრიალა გახდება, ამოღეთ ყველის გუნდა ქვაბიდან, გადაიტანეთ ხის დაფაზე და კარგად გააბრტყელეთ. დანაყულ პიტნას დაასხით ძალიან ცოტა რაოდენობით წყალი და უკვე, გათხელებულ სულგუნს ზემოდან კარგად გადაუსვით. ყველის დამუშავება ხელით განაგრძეთ, რომ პიტნა კარგად შევიდეს მასაში. ცალკე ჯამში მოთავსებულ ნადუღს მოაყარეთ დანაყული პიტნა და ცოტაოდენი მარილი, კარგად გადაურიეთ ერთმანეთში და გაბრტყელებულ სულგუნზე, ზემოდან ხელით ან თუ გნებავთ, კოვზით გადაანაწილეთ. ბოლოს კი, გაბრტყელებული ყველის ფენა რულეტივით გადაახვიეთ. უკვე შეგრილებული სულგუნის რულეტი საშუალო ნაჭრებად დაჭერით და თეფშზე გადაიტანეთ.
გებჟალიას ბევრი მშრალად მიირთმევს, ბევრს კი მისივე წვენში ჩაწყობილი გებჟალიას ნაჭრები უფრო მოსწონს. გებჟალიას წვენი უმარტივესი მოსამზადებელია. ქვაბში დარჩენილ სულგუნის ნახარშს კარგად ნადაყული პიტნა, ნადუღი და ოდნავ მარილიც დაუმატეთ. კარგად შეაზილეთ ერთმანეთში, ისე, რომ საშუალო სისქის მასა მიიღოთ და მიღებული წვენი ღრმა ჯამზე ან თეფშზე გადაიტანეთ. დაელოდეთ მის შეგრილებას და ბოლოს, დაჭრილი გებჟალიას ნაჭრები ამ წვენშივე ჩააწყვეთ. სულ ეს იყო, უგემრიელესი გებჟალია მზად არის!

შენიშვნა:
გებჟალიას ბევრი რძეში ამზადებს, თუმცა, მისი წყალზე მომზადებაც მიღებულია.
გაბრტყელებულ სულგუნს, ნადუღთან ერთად, შეგიძლიათ, ოდნავ აჯიკაც გადაუსვათ. ეს თქვენს სურვილსა და გემოვნებაზეა დამოკიდებული.
გებჟალიას მომზადებისას, ეცადეთ, კერძი არ გადაამლაშოთ. შეარჩიეთ ნაკლებმარილიანი ყველი  და ნადუღსაც მარილი ძალიან მცირე რაოდენობით მოაყარეთ.
ქვაბიდან ამოღებული სულგუნის გუნდა მის შეგრილებამდე გააბრტყელეთ. ცხელი ყველი უფრო ადვილად მოგყვებათ ხელში.
გებჟალიას გასაფორმებლად შეგიძლიათ, ბროწეულის მარცვლები, სალათის ფურცლები და უმი სტაფილო გამოიყენოთ.
გებჟალიას, ტრადიციულად, ღომთან მიირთმევენ, თუმცა ესეც გემოვნების საკითხია. 
გებჟალიას მოსამზადებლად, მაქსიმუმ, 30 წუთი დაგჭირდებათ.

ფოტოგრაფი: ნინუცა მანდარია