1 ულუფა კიევური კატლეტის მოსამზადებლად საჭიროა:
ქათმის ფილე - 200 გრ;
კვერცხი - 1 ცალი;
ნიორი - 1 კბილი;
საფანელი - 100 გრ;
პურის ფქვილი - 50 გრ;
ლიმონი - ნახევარი;
კარაქი - 50 გრ;
მარილი, პილპილი - გემოვნებით.
მომზადების წესი:
ჯამში ჩადეთ კარაქი, მოასხით ლიმონის წვენი, მოაყარეთ მარილი, პილპილი და კარგად მოზილეთ.
კარგად დაბეგვილ ქათმის ფილეს წაუსვით დაჭყლეტილი ნიორი, მოაყარეთ მარილი და შავი პილპილი. დაადეთ ზედ მოზელილი კარაქი. შემდეგ კი ფილეს ნაჭერი გადაახვიეთ.
გადახვეული ფილე ამოავლეთ პურის ფქვილში და ჩადეთ საყინულეში, დაახლოებით, ნახევარი საათით.
როგორც კი საყინულიდან გამოიღებთ, ამოავლეთ ჯერ ათქვეფილ კვერცხში, შემდეგ საფანელში.
ეს პროცედურა ორჯერ გაიმეორეთ, რათა ფილე კარგად შეიკრას და კარაქმა არ გამოჟონოს.
ქვაბში ჩაასხით ბლომად ზეთი (ისე, რომ კატლეტი კარგად დაიფაროს).
როგორც კი ზეთი ადუღდება, ჩადეთ ქვაბში კატლეტი და ცეცხლს ოდნავ დაუკელით.
კატლეტი ხშირად გადააბრუნეთ და ყურადღება მიაქციეთ, რომ ყველა მხრიდან თანაბრად დაიბრაწოს.
შენიშვნა:
კატლეტის შეწვის პროცესი, დაახლოებით, 25 წუთი უნდა გაგრძელდეს, ამიტომ, უმჯობესია, ნელ ცეცხლზე მოამზადოთ.
სასურველია, გადახვეული ქათმის ფილე საკვების შესაფუთ პარკში შეახვიოთ და შემდეგ ჩადოთ საყინულეში.
კიევური კატლეტის შესაწვავად შედარებით თხელი ფილეს ნაჭერი შეარჩიეთ.
კიევური კატლეტისთვის გარნირად შეგიძლიათ, პიურე მოამზადოთ.
მოასხით ტყემალი, კეტჩუპი ან საწებელი და გემრიელად მიირთვით!
ფოტოგრაფი: ნინუცა მანდარია