ბოსტნეულის სალათის რეცეპტს რესტორან „შატროს“ ევროპული სამზარეულოს მზარეული ალექსანდრე კოშკელოვი გვიზიარებს.
ბოსტნეულის სალათის მოსამზადებლად საჭიროა:
სალათის ფურცლები
წითელი და მწვანე ბულგარული წიწაკა - 2 ცალი;
სტაფილო - 1 ცალი;
კიტრი - 1 ცალი;
ქამა სოკო - 100 გრამი;
ლიმონი - ნახევარი;
ზეითუნის ზეთი - 30 გრ;
მწვანე ხახვი - 2-3 ღერი;
ბალზამიკო - გემოვნებით;
სოიოს სოუსი - გემოვნებით.
მომზადების წესი:
სალათის ფურცლები დაჭერით საშუალო ზომაზე და მოათავსეთ ჯამში.
სალათის ფურცლებს დაამატეთ წვრილად დაჭრილი მწვანე და წითელი ბულგარული წიწაკა.
შემდეგ, დაამატეთ კანიანად დაჭრილი კიტრი, უმი ქამა სოკო და მწვანე ხახვი. მიღებულ მასალას მოასხით ლიმონის წვენი, სოიოს სოუსი, ბალზამიკო და სულ ბოლოს, ზეითუნის ზეთი. ინგრედიენტები ერთმანეთში კარგად გადაურიეთ. გადაიტანეთ მოზრდილ თეფშზე, გაალამაზეთ და გემრიელად მიირთვით.
შენიშვნა:
ბოსტნეულის სალათს მარილის დამატება არ სჭირდება, რადგან ბალზამიკო და სოიოს სოუსი მარილს შეიცავს და სალათი, შესაძლოა, გადაამლაშოთ;
თუკი სახლში სეზამის მარცვალი გეგულებათ, გამზადებულ სალათს სულ ბოლოს მოაყარეთ. ეს კერძს გაალამაზებს და განსხვავებულ გემოსაც შესძენს.
უმი ქამა სოკოს მირთმევის ნუ შეგეშინდებათ, ის ორგანიზმისთვის აბსოლუტურად უსაფრთხოა.
ბოსტნეულის სალათის მომზადებას 10 წუთი დასჭირდება.
გემრიელად მიირთვით!
ფოტოგრაფი: გოგა მოსიაშვილი