„ცეზარის“ სალათის მოსამზადებლად საჭიროა:
ქათმის ფილე - 150 გრ;
სალათის ფოთოლი - 100 გრ;
ყველი (პარმაზანი ან გრანოპადანო) – 30 გრ;
ნივრიანი ორცხობილა (სუხარი) - გემოვნებით;
დრესინგი - 40 გრ.
პირველ რიგში, „ცეზარის“ სალათზე მოსასხმელი სოუსის (დრესინგის) მომზადების წესს გადავხედოთ. სოუსისთვის საჭიროა:
მაიონეზი - 30 გრ;
სოიოს სოუსი - 1 ჩ/კ;
კაპერსი - 2 ცალი;
ანჩოუსი - 2-3 გრ;
პარმაზანის ყველი - 2 გრ;
თეთრი პილპილი - 1 მწიკვი;
ლიმონის წვენი - 1 ჩ/კ;
ნიორი (დაჭყლეტილი) - 1 კბილი;
მოხარშული კვერცხი - ნახევარი.
ზემოჩამოთვლილი ინგრედიენტები ერთმანეთში გადაურიეთ და დააბლენდერეთ. ცეზარისთვის საჭირო სპეციალური სოუსი მზად არის.
დრესინგის მომზადება მარტივადაც შეგიძლიათ: მაიონეზს დაამატეთ ლიმონის წვენი, სოიოს სოუსი, თეთრი ან შავი პილპილი, დაჭყლეტილი ნიორი და ერთმანეთში კარგად გადაურიეთ.
ახლა კი „ცეზარის“ მომზადებას შევუდგეთ:
გარეცხილ ფილეს მოაყარეთ მარილი, პილპილი და შეწვით ზეთმოსხმულ ტაფაზე.
როგორც კი ფილე ერთი მხრიდან შეიწვება და გადმოაბრუნებთ, ზედ მოასხით თეთრი ღვინო.
გარეცხილი სალათის ფოთლები დაჭერით საშუალო ზომებზე, მოასხით სპეციალური დრესინგი და კარგად გადაურიეთ ერთმანეთში.
დრესინგიანი სალათის ფოთლები გადაიტანეთ მოზრდილ თეფშზე და ზედ დაალაგეთ შემწვარი ფილეს ნაჭრები.
ბოლოს კი, მოაყარეთ გახეხილი ყველი და ნივრიანი სუხარი.
შენიშვნა:
იმისთვის, რომ „ცეზარი“ უფრო გემრიელი გამოგივიდეთ, გამოიყენეთ სხვადასხვა სახეობის სალათის ფოთლები.
თუკი ნივრიანი ორცხობილების სახლში მოსამზადებლად დრო არ გაქვთ, შეგიძლიათ, სალათს ჩვეულებრივი „კუბეტები“ მოაყაროთ.
ამ სალათისთვის საჭიროა ყველი პარმაზანი ან გრანოპადანო, მაგრამ თუკი ყველის ეს სახეობები არ გაქვთ, შეგიძლიათ, „ცეზარი“ შებოლილი სულგუნით მოამზადოთ.
გემრიელად მიირთვით!
ფოტოგრაფი ალექსანდრე სხულუხია.