„ბეფსტროგანოვის“ რეცეპტს რესტორან „შატროს“ ევროპული სამზარეულოს მზარეული ალექსანდრე კოშკელოვი გვიზიარებს.
„ბეფსტროგანოვის“ მოსამზადებლად დაგჭირდებათ:
საქონლის ან ხბოს ხორცი - 200 გრ;
ხახვი - 1 პატარა თავი;
პურის ფქვილი - 1 ჩ/კ;
კარაქი - 20 გრ;
ტომატი პასტა - ნახევარი ჩ/კ;
არაჟანი - 1 ს/კ;
ნაღები - 2 ს/კ;
კარტოფილი - 1 ცალი;
მარილი და პილპილი - გემოვნებით;
მომზადების წესი:
კარგად გარეცხილი ხორცი დაჭერით ჟულიენებად და შეწვით კარაქში.
დაამატეთ წვრილად დაჭრილი ხახვი და ურიეთ.
როგორც კი ხახვი მოითუშება, ტაფაზე მოაყარეთ პურის ფქვილი, შემდეგ კი დაამატეთ ტომატი, ნაღები და არაჟანი.
ეს ყველაფერი ერთმანეთში კარგად გადაურიეთ.
ბოლოს კი დაამატეთ მარილი და პილპილი.
ამის შემდეგ სულ ცოტა ხანი გააჩერეთ ცეცხლზე და გამორთეთ.
ცალკე ტაფაზე შეწვით ძალიან წვრილად დაჭრილი კარტოფილი. მოაყარეთ მარილი, ცოტა პილპილი და წვრილად დაჭრილი ოხრახუში.
ტაფაში მომზადებული ხორცი გადმოიღეთ დიდ თეფშზე შუაგულში, გვერდებზე კი წვრილად დაჭრილი შემწვარი კარტოფილი შემოუწყვეთ.
სულ ეს არის.
შენიშვნა:
„ბეფსტროგანოვი“ სოკოთიც მზადდება და, ხორცის ნაცვლად, შეგიძლიათ სოკო გამოიყენოთ;
„ბეფსტროგანოვის“ მოსამზადებლად 20-25 წუთი საკმარისია.
ალბათ, გახსოვთ, რომ ხორციან ტაფაში ნაღებსაც ვასხამთ, მაგრამ, თუკი მიუხედავად ამისა, კერძი ოდნავ შესქელდა, შეგიძლიათ, სულ ცოტა წყალი დაამატოთ.
ძვირფასო დიასახლისებო, იცით, რომ ხბოს ხორცი სწრაფად მზადდება და „ბეფსტროგანოვის“ მოსამზადებლად სასურველია, ხბოს ხორცი გამოიყენოთ, საქონლის ხორცი კი უმჯობესია, წინასწარ მოხარშოთ და შემდეგ ტაფაზე მობრაწოთ.
გემრიელად მიირთვით!
ფოტოგრაფი: ალექსანდრე სხულუხია