ლევან გვაზავა: მოგეხსენებათ, ჩვენს რეალობაში მომღერლებისა და მუსიკოსების დიდი სურვილის მიუხედავად, გამართონ კონცერტები და ჩაწერონ ალბომი, მეგაპროექტში მონაწილეობის შემდეგ (და არამარტო) თითქმის ყველა აწყდება პრობლემებს, რის გამოც იძულებულები ხდებიან, მხოლოდ სოციალურ ქსელსა თუ ინტერნეტს დასჯერდნენ. ეს, დარწმუნებული ვარ, ყველა მუსიკოსის პროტესტს იწვევს. სწორედ ამ პროტესტის საფუძველზე გაჩნდა კონცერტის იდეა. კონცერტის სახელწოდება კი, UPRISING, რაც ქართულად აჯანყებას ნიშნავს, ამართლებს იდეას. თუმცა Up Ri SING სიტყვების თამაშია: რადგან კონცერტის მთავარი მოქმედება იმპროვიზებულ სახურავზე ხდება. UP RISE SING - შეიძლება, გაიშიფროს, როგორც „სიმღერა მაღლა სახურავზე“. ეს არის პროექტი, რომელიც არ შემოიფარგლება ერთი კონკრეტული კონცერტით. გვინდა, გავაგრძელოთ სხვადასხვა ლოკაციაში და, რაც მთავარია, ყურადღება მივიქციოთ.
- როგორ ფიქრობთ, რას შეცვლის თქვენი „აჯანყება“ შოუბიზნესში?
- შოუბიზნესში რაღაცის შეცვლას, არა მგონია, ერთი აჯანყება შველოდეს, თუმცა კონცერტი სწორედ იმ მესიჯს გზავნის, რომ ოდესმე ყველაფერი გამოსწორდება, თუკი ყველა საკუთარი თავით დაიწყებს. მთავრია სურვილი, მონდომება და ერთმანეთის მოსმენა.
- თქვენი მუსიკალური კარიერა საიდან დაიწყო?
- მუსიკალური პროექტის „ახალი ხმის“ ნახევარფინალისტი ვიყავი. წინა წელს ჩავწერე მინიალბომი LP „Promo Only“, რომელშიც 4 საავტორო სიმღერა შევიდა, თუმცა CD მცირე რაოდენობით გაიყიდა. ვმუშაობ ახალ სიმღერებზეც და ვეცდები, ხარისხიანი პროდუქტი წარმოვადგინო.
- მოზარდ მაყურებელთა თეატრის მსახიობიც ხართ...
- თეატრში გავიზარდე. მამა მუსკომედიის თეატრის ყოფილი მსახიობია. ახლა კი რეზო გაბრიაძის თეატრში მუშაობს. მუსიკა ყოველთვის მიყვარდა, თუმცა ბავშვობის შემდეგ პირველად თეატრალურ ინსტიტუტში ჩაბარებისას ავმღერდი. დიდი სურვილი მაქვს, რაიმე მიუზიკლშიც ვითამაშო.
- ერთი პერიოდი სერიალ ჩცდ-შიც გამოჩნდით...
- დიახ - რეჟისორ ბერგმანას როლში. ჩემი პერსონაჟი ცოტნე ცოტაშვილს სარეკლამო კლიპებს უღებს.
- ოჯახზეც გვიამბეთ...
- ჩემი მეუღლე, ევგენია ქორიძე თეატრის გრიმიორია. გვყავს შვილი, 8 წლის ნუცა, რომელზეც ვაფანატებ. ხატავს, მღერის, ცეკვავს, უკრავს ფორტეპიანოზე და ჩემი დიდი გულშემატკივარია.