სიმღერის შექმნის ისტორიას Funtime-ს ჯანო ბაგრატიონის ვაჟი, ვეტერანი ხელბურთელი და ოლიმპიური კომიტეტის ყოფილი პრეზიდენტი, უმცროსი ჯანო ბაგრატიონი უყვება.
უცნობი ავტორი
ქუთაისში ერთ-ერთ ოჯახში წვეულებაზე ჩასული იყო მამას მეგობარი გოგი ვასაძე (აკაკი ვასაძის შვილი), რომელიც თვითონაც კარგად მღეროდა. წვეულებაზე სტუმრად მყოფმა, გოგისთვის უცნობმა ქალმა გიტარა მოითხოვა, ჩამოჰკრა თურმე ამ ქალმა გიტარას და „ყვავილების ქვეყანა“ იმღერა. სამწუხაროდ, ამ ქალბატონის ვინაობა უცნობია. გოგის ძალიან მოსწონებია ეს სიმღერა, თანაც იცოდა, მამაჩემი ქართულ ჯაზ-ორკესტრს აყალიბებდა. ამიტომ ეს სიმღერა მამას მოასმენინა და შესთავაზა, ორკესტრთან ერთად შეესრულებინა. მამას სიმღერა ძალიან მოეწონა და ორკესტრისთვის სიმღერის არანჟირება თავის მეგობარს, ცნობილ კომპოზიტორს, მიხეილ ჩირინაშვილს სთხოვა. მიშამ სიმღერის არანჟირება გააკეთა. რაც შეეხება ტექსტს, ის ვერსია, რომელსაც ვასაძემ ქუთაისში მოუსმინა, იოსებ გრიშაშვილის ლექსის მიხედვით იყო შექმნილი. ტექსტი ცოტა გადიდებას საჭიროებდა. მამამ სიმღერის ტექსტის ახალი ვერსიის შექმნა კიდევ ერთ თავის მეგობარს ბიძინა ფერაძეს (მსახიობ გია ფერაძის მამა) სთხოვა, რომელიც ძალიან კარგ ლექსებს წერდა. კონცერტი 1946 წლის 6 დეკემბერს კონსერვატორიის დიდ საკონცერტო დარბაზში გაიმართა - ეს სიმღერაც ჯანოს ორკესტრის შესრულებით პირველად იქ შესრულდა.
ერთ კონცერტზე 11-ჯერ შესრულებული „ყვავილების ქვეყანა“
მამას საქართველოს ქალაქებში გასტროლებზე სულ თან დავყვებოდი. მაშინ მხოლოდ 8 წლის ვიყავი. მახსოვს, ქუთაისში ჩავედით, კონცერტის პირველ განყოფილებას ორკესტრის სოლისტი თემო ხელაშვილი ამთავრებდა. მას იმ დროს ერთი პოპულარული სიმღერა ჰქონდა და სწორედ ამ სიმღერას ასრულებდა. მაყურებელი თემოს სცენიდან არ უშვებდა. მე და მამა კულისებში ვიდექით და ვუყურებდით, როგორ უხმობდა ბისზე დარბაზი. თემომ სიმღერა 9-ჯერ შეასრულა. ბოლოს, როცა სცენიდან გამოვიდა, კულისებში მამა გადაეხვია, მიულოცა და უთხრა: თემო, შენ ხომ იმღერე შენი სიმღერა 9-ჯერ, აი, ნახავ - მე „ყვავილებს“ 11-ჯერ შევასრულებო. „ყვავილების ქვეყანა“ იმ ქუთაისურ კონცერტს ხურავდა. გავიდა ჯანო სცენაზე, 10-ჯერ რომ იმღერა, ფიქრობდა, საკმარისი იქნებაო, მაგრამ მაყურებელი მაინც ოვაციებით ითხოვდა გამეორებას. მამამ იმ კონცერტზე მართლაც 11-ჯერ შეასრულა „ყვავილების ქვეყანა“.
ამ სიმღერის შესრულება ყოველთვის მინდოდა
მე ტექნიკური უნივერსიტეტის ორკესტრში ვმღეროდი. ძალიან მომწონდა ეს სიმღერა, მაგრამ მამას სიცოცხლეში ვერ ვბედავდი, შემესრულებინა. შეიძლებოდა ისეთი არ გამოსულიყო, როგორსაც მამა ელოდა. ერთ მშვენიერ დღეს დაგვირეკა იოსებ ტუღუშმა - იგი მამას ჯაზ-ორკესტრის მუსიკალური ხელმძღვანელი და დირიჟორი გახლდათ. ფილარმონიის დიდ საკონცერტო დარბაზში ჯაზ-ორკესტრის 50 წლისთავის აღსანიშნავი კონცერტი უნდა გამართულიყო. სოსოს ვთხოვე, რომ მე „ყვავილების ქვეყანას“ შევასრულებდი. სწორედ მაშინ - 1989 წელს ვიმღერე პირველად ეს სიმღერა დიდ სცენაზე.
გთავაზობთ, პირველად ინტერნეტსივრცეში, დიდი ჯანო ბაგრატიონის მიერ შესრულებულ „ყვავილების ქვეყანას“!