რატომ არ მონაწილეობს ბარბარა სამხარაძე ახალ პროექტში „მხოლოდ ქართული“?

- „მხოლოდ ქართული“ ჩვენი ქვეყნის პროექტია და სიახლეა. მიუხედავად იმისა, რომ „მხოლოდ ქართულში“ ყველა კონკურსანტი ძლიერია, ჩემი რჩეულიც მყავს - ალექსანდრე კახეთიდან.

- პროექტში მონაწილეობაზე არ გიფიქრიათ?
- ყველა მეუბნება, რომ რომელიმე პროექტში ისევ უნდა მივიღო მონაწილეობა, თუმცა სხვაგვარად ვფიქრობ - სიყვარული უკვე მოვიპოვე და არ მინდა, ხალხის სალანძღავი გავხდე. მირჩევნია მსმენელს სიახლე შევთავაზო.

- რატომ ფიქრობთ, რომ მუსიკალურ პროექტში მონაწილეობის გამო ხალხი გაგლანძღავთ?
- იცით, ვინმე ორჯერ რომ მივიდეს პროექტში, მეც ვიფიქრებ, რით ვერ დაკმაყოფილდა-მეთქი და, მით უმეტეს, ჩემს შემთხვევაში. ხალხი „ნიჭიერში“ გამარჯვებას დღემდე მილოცავს.

- კარიერაში სიახლე თუ გაქვთ?
- 4 საავტორო სიმღერა უკვე დავწერე. ორი ინგლისურია, ორიც - ქართულ-ინგლისური. ჯერ სოფელში ვცხოვრობ. თბილისში რომ გადმოვალ საცხოვრებლად, იმედია, ერთს მაინც ჩავწერ. 

- თბილისში საცხოვრებლად გადმოსვლას როდის გეგმავთ?
- მე-12 კლასს ვამთავრებ. წელს გამოცდები მაქვს და სკოლის დამთავრებისთანავე საცხოვრებლად ქალაქში გადმოვალ, თუმცა რას ვაპირებ, ჯერ არ გადამიწყვეტია. დრო მიჩვენებს... გულახდილად გეტყვით, რომ შემოთავაზებაც არ მაქვს.