- „ნიჭიერს“ ყოველთვის ვუყურებდი და მომწონდა. ამ პროექტმა ნიჭის გამოვლენის საშუალება ბევრ ადამიანს მისცა. სწორედ ამან გადამაწყვეტინა მონაწილეობა. იმედი მაქვს, ჩემს შესაძლებლობებს მაქსიმალურად წარმოვაჩენ.
- კონკურენციაზე რას გვეტყვით?
- საკმაოდ დიდი კონკურენციაა. მით უმეტეს, პროექტში სხვადასხვა ნიჭით დაჯილდოებული ადამიანები მონაწილეობენ. მთავარია, ხალხის მოწონება დავიმსახურო და ყველაფერი ამის მიხედვით გადაწყდება. მიყვარს სიმღერა და ბედნიერი ვიქნები, თუ ჩემი ხმა სხვასაც სიამოვნებას მიანიჭებს.
- სცენაზე გასულმა აღნიშნეთ, რომ თავის დროზე კონსერვატორიაში ჩაბარებას გეგმავდით...
- დიახ, ასეა. სიმღერა ბავშვობიდან მიყვარს და სკოლის დამთავრების შემდეგ კონსერვატორიაში ჩაბარება გადავწყვიტე. სამწუხაროდ, დამოუკიდებლად ნასწავლი სოლფეჯიო გამოცდების ჩასაბარებლად საკმარისი არ აღმოჩნდა და ქულა დამაკლდა. მაშინ საკმაოდ რთული პერიოდი იყო, 1996-97 წლები, არც მომზადების საშუალება მქონდა და არც მუსიკალური კონკურსები არსებობდა. სწორედ ამ დროს გავიცანი ჩემი მომავალი მეუღლე ზაალ წერეთელი და დავოჯახდით. ამის შემდეგ 18 წელი ისე გავიდა, არ მიმღერია. ამჟამად სამი შვილის - 11 წლის ელენეს, 9 წლის ზურაბისა და 5 წლის სესილის აღზრდით ვარ დაკავებული.
- ვინ არის თქვენი ყველაზე დიდი გულშემატკივარი?
- მეუღლე და ის ადამიანები, ვინც პროექტში მონაწილეობა გადამაწყვეტინა. ზაალიც მომღერალია. რთული ეკონომიური მდგომარეობის გამო ბაქოში წავიდა, სადაც ერთ-ერთ რესტორანში მღერის.
- როგორ ფიქრობთ, რას მოგიტანთ „ნიჭიერი“?
- იმედი მაქვს, „ნიჭიერით“ დიდი ხნის აუხდენელ ოცნებას ავისრულებ. ვნანობ იმ პერიოდს, როცა ახალგაზრდა ვიყავი და საკუთარი თავისთვის და საქართველოსთვის მეტის გაკეთება შემეძლო. მინდოდა, დიდი მომღერალი ვყოფილიყავი! მას შემდეგ მთელი ცხოვრება სცენა მესიზმრებოდა, რაც ნაწილობრივ ამისრულდა.