კინომცოდნე - ორგანიზატორული ნიჭით
კორნელი კეკელიძის სახელობის 29-ე სკოლა დავამთავრე და იმავე წელს თეატრალურ ინსტიტუტში, კინომცოდნეობის ფაკულტეტზე ჩავაბარე.
აქტიური მუშაობა ორგანიზატორული კუთხით სტუდენტობიდან დავიწყე და დღემდე ამ სფეროში ვაგრძელებ მუშაობას. ჯერ კიდევ სტუდენტობის დროიდან ჩავერთე სხვადასხვა ფესტივალების ორგანიზებაში, მქონდა სხვადასხვა პროექტები კინოს მიმართულებით... ინსტიტუტის დამთავრების შემდეგ ცოტა ხანს ვიმუშავე ჟურნალებში - „ანაბეჭდში“ და „ამარტაში“... გარდა იმისა, რომ ამ ჟურნალებისთვის სტატიებს ვწერდი, სარეკლამო მიმართულებითაც ვმუშაობდი. ამის მერე ცოტა ხანს რადიო „მწვანე ტალღაში“ ვიყავი, მაგრამ მალევე ტელევიზიაში - ტელეკომპანია „მზეზე“ გადავედი, გადაცემა „ტაბუს“ პროდიუსერად... მოგვიანებით, რესტორნებისა და სასტუმროების ქსელ „მ ჯგუფში“ დავიწყე მუშაობა და ღონისძიებების ორგანიზებით დავინტერესედი. სხვათა შორის, ამან იმდენად დიდი გამოცდილება მომცა, რომ მალე ამავე მიმართულებით საკუთარი ორგანიზაციაც კი დავაფუძნე. შემდეგ 4 წელი სასმელების კომპანია „ჯდ ალკო“-ში ვიმუშავე და სხვადასხვა საერთაშორსო ბრენდებს ვკურირებდი, ამავდროულად მედიასთან ურთიერთობაც მევალებოდა. მოკლედ, ძალიან საინტერესო პროცესი იყო...
ორი შვილის დედობა, რამდენიმე სამსახური და სწორად გადანაწილებული დრო
ამჯერად რამდენიმე სამსახური მაქვს. „არაი თუმოროუს“ პიარისა და მარკეტინგის განყოფილებას ვხელმძღვანელობ. პარალელურად მაქვს საკუთარი კომპანია, სადაც სხვადასხვა პროექტებს ვახორციელებ, როგორც პიარის, ასევე ივენთ მენეჯმენტის კუთხით. ვმუშაობ, ასევე, უკრაინულ კომპანია „შაბო“-ში და ცოტა ხნის წინ, ჩემს მეგობრებთან ერთად, გავაკეთე ტანსაცმლის მაღაზია „დი პიერო“, სადაც ყველა ქალისთვის საოცნებო ბრენდები იყიდება...
მართალია, ძალიან რთულია ერთდროულად ამდენ ადგილას მუშაობა, თანაც პიარი ხომ ასე მარტივი არაა და მხოლოდ მედიასთან ურთიერთობას კი არა, მარკეტინგის უამრავ ნიუანსს მოიცავს. თუმცა, იმდენად აქტიური ადამიანი ვარ, რომ მირჩევნია, რამდენიმე პროექტით ვიყო დაკავებული და მაქსიმალურად დავიხარჯო, ვიდრე ერთ კომპანიაში ვიმუშაო და სანახევროდ გამოვიყენო ჩემი შესაძლებლობები. თან ორი მცირეწლოვანი შვილი მყავს - 2,5 წლის ნინა და 1 წლის ალექსანდრე, შესაბამისად მათაც სჭირდებათ ყურადღება.
ხშირად მეკითხებიან, ამდენს როგორ ვახერხებ? ვფიქობ, მთავარი აქაც სწორი მენეჯმენტია - პირველ რიგში, დროის სწორად დაგეგმვა უნდა შეგეძლოს, უნდა იყო შრომისმოყვარე და მიზანდასახული და, რაც მთავარია, აუცილებლად უნდა გწყალობდეს იღბალი.