დღის დედოფალია 25 წლის მარიამ უზნაძე, პროფესიით ეკონომისტი.
სიძე - 27 წლის კაკი ლობჟანიძე, პროფესიით ლოტბარი, მარნეულის კულტურის ცენტრთან არსებული სიმღერის ანსამბლ „იბერიას“ ხელმძღვანელი და სახელმწიფო ანსამბლ „რუსთავის“ მოცეკვავე.
ერთმანეთი საერთო მეგობრებთან გაიცნეს ლაგოდეხში, 20 აგვისტოს, უქმეებზე. პირველად სულ ნახევარი საათით შეხვდნენ ერთმანეთს, თუმცა მეორე დღიდან სოციალურ ქსელში აქტიური კონტაქტი დაიწყეს. გაცნობიდან მეოთხე დღეს ისევ შედგა მათი შეხვედრა და ძალიან მარტივად მოახერხეს დაახლოება.
პირველი შეხვედრის შემდეგ უკვე გრძნობდა მარიამი, რომ კაკის გარეშე ყოფნა აღარ უნდოდა. როგორც აღმოჩნდა, კაკიც იმავეს ფიქრობდა.
გაცნობიდან მეათე დღეს ანსამბლთან ერთად კაკი გასტროლზე წავიდა და 2 დღეში იქიდან სთხოვა მარიამს ცოლობა. მარიამს ეს გადაწყვეტილება ცოტა ნაჩქარევად მიაჩნდა და პასუხს არ ჩქარობდა, მაგრამ, საბოლოოდ, ზუსტად 8 თვის თავზე შექმნეს ბედნიერი ოჯახი, სადაც მათი სიყვარული დღითი დღე სულ უფრო ძლიერდება.