დღის დედოფალია 29 წლის ნინა კვირჭიშვილი.
სიძე - 28 წლის კახა კუპრაშვილი.
კახამ ნინა მანქანიდან შენიშნა და გადაწყვიტა, აუცილებლად გაეცნო. ამ მიზნით ბიჭი ხშირად მიდიოდა იმ ადგილზე, სადაც გოგოს პირველად მოჰკრა თვალი.
ერთ დღესაც კახა მეგობართან ერთად იყო, როცა უეცრად ნინა დაინახა. აღმოჩნდა, რომ კახას მეგობარი ნინას კლასელი იყო და... ასე გაიცნეს ერთმანეთი.
ნინა ყველანაირად ცდილობდა, მიზეზი ეპოვა და კახასთვის შეხვედრაზე უარი ეთქვა, თუმცა გავიდა დრო და გული მოულბა. გადაწყვიტა, კახას შეხვედროდა, რომელიც თითქმის ყოველდღე მოდიოდა მის სახლთან...
გოგოს პირველი პაემნის შემდეგ უარის თქმის მიზეზი აღარც უძებნია.
ყველაფერი იდეალურად მიდიოდა, მაგრამ გარკვეული დროის შემდეგ თავდაპირველი ემოციები თითქოს გაქრა, ურთიერთობაც გაცივდა და ბოლოს შეწყდა კიდეც.
დაშორებიდან თითქმის ერთი წელი იყო გასული, როცა ახალი წლის ღამეს ერთ-ერთ რესტორანში კახა და ნინა სრულიად შემთხვევით შეხვდნენ ერთმანეთს.
აღმოჩნდა, რომ ძველი სიყვარული სულაც არ გამქრალა, მათ თავიდან იპოვეს „დაკარგული ერთმანეთი“.
ამბობენ, ახალ წელს რასაც ჩაიფიქრებ, აუცილებლად აგისრულდებაო. ნინას და კახას ახალი წლის ჯადოსნური ზღაპარიც ახდა.
მათ ჯვარი სვეტიცხოველში დაიწერეს.
