დღის დედოფალია 22 წლის მარიამ სიხარულიძე.
სიძე - 22 წლის ივა ნინიკაშვილი.
ერთმანეთი უნივერსიტეტში გაიცნეს. ყველაფერი უბრალო გამარჯობით დაიწყო და კარგა ხანს ერთმანეთთან სხვა არაფერი აკავშირებდათ...
თუმცა ერთ დღეს სიტუაცია შეიცვალა - ერთ-ერთ ლექციაზე შესულმა მარიამმა აღმოაჩინა, რომ ერთადერთი გოგო იყო. თავი მარტოდ რომ არ ეგრძნო, ივამ შესაბამისი მომენტი იპოვა, მივიდა და გაეცნო.
მარიამისთვის უჩვეულო იყო ის ფაქტი, რომ, სადაც არ უნდა გაეხედა, სადაც არ უნდა წასულიყო, რა სიტუაციაშიც არ უნდა აღმოჩენილიყო, ივა ყველგან მოულოდნელად ჩნდებოდა.
გაცნობიდან 2 კვირის შემდეგ, მიუხედავად იმისა, რომ მაშინ ამის არანაირი საბაბი არ არსებობდა, რატომღაც გაიფიქრა, რომ ეს ბიჭი მომავალში აუცილებლად გახდებოდა მისი ქმარი.
1 წლის განმავლობაში ყოველდღე მოუთმენლად ელოდა მარიამი, როდის გამოუტყდებოდა ივა სიყვარულში. ამ დროის მანძილზე ხშირად იყვნენ ერთად, თანდათან ახლოვდებოდნენ.
ერთ დღესაც საერთო მეგობართან შეიკრიბნენ. მაშინ მოულოდნელად მიეპარა ივა მარიამს და ჩასჩურჩულა: „მოვა დრო და შენ აუცილებლად ჩემი ცოლი გახდები...“
