რა თქმა უნდა, ქიმიკატები აბაზანის გახეხვას ან ცხიმით დასვრილი ქვაბის გახეხვას აიოლებს, თუმცა მათი ხშირი გამოყენება თქვენს ჯანმრთელობაზე უარყოფითად აისახება.
ყველას გვაინტერესებს, რატომ გახშირდა ავთვისებიანი სიმსივნეები, ჰიპერტონიული და გულ-სისხლძარღვთა დაავადებები და ქალთა უნაყოფობა, მაგრამ არავინ უფიქრდება, რომ ამის ერთ-ერთი მიზეზი შეიძლება საყოფაცხოვრებო ქიმიის ბოროტად გამოყენება იყოს.
როგორ რთულად წარმოსადგენადაც არ უნდა გეჩვენებოდეთ, საყოფაცხოვრებო ქიმიის ერთ-ერთი ყველაზე საშიში ნივთიერება „დიქლოფოსი“ კი არა, ჩვეულებრივი ჰაერის გამწმენდი გახლავთ.
ის პრაქტიკულად ყველა აბაზანასა და საპირფარეშოში შეიძლება აღმოაჩინოთ. სახლში სასიამოვნო სურნელის დატრიალების სურვილს ფლაკონის ხშირ გამოყენებამდე და შესაბამისად, ჰაერის ფტალატებით გაჯერებამდე მივყავართ, რაც პირდაპირ დაკავშირებულია ავთვისებიან სიმსივნეებთან და ჯანმრთელობის სხვა პრობლემებთან.
ფტალატები სახიფათო ნაერთებია, რომლებიც შეიცავს 2,5-დიკლოროფენოლს (2, 5 DCP) და ნეგატიურად მოქმედებს ყველა ქალზე.
აღსანიშნავია, რომ საკვები პროდუქტების, კოსმეტიკური საშუალებებისა და სხვა ნივთების შეფუთვა ფტალატების გარკვეულ რაოდენობას შეიცავს.
სამეცნიერო დაკვირვებებმა დაადასტურა, რომ მათი ხანგრძლივი მოქმედება აუარესებს ჯანმრთელობის მდგომარეობას, ზრდის კიბოს გაჩენისა და მუცლის მოშლის ალბათობას.
საფრთხე იმდენად რეალურია, რომ ბოლო დროს მთელი მსოფლიოს დიასახლისები უპირატესობას, ქიმიკატების ნაცვლად, ბუნებრივ და ნატურალურ საშუალებებს ანიჭებენ.
ცნობისთვის, საცხობი სოდისა და ეთერზეთების კომბინაციით მშვენიერი ჰაერის გამწმენდის დამზადებაა შესაძლებელი. სასიამოვნო სურნელის მისაღებად კარგი საშუალებაა არომატული სუნელებისა და ციტრუსების შეზავების გზით მიღებული ჰაერის გამწმენდი.
