ბურგერის „დამარცხების“ მსურველი არცთუ ისე ბევრია - ბურგერი ხომ 3,5 კილოგრამს იწონის.
მისი ბოლომდე შეჭმა მხოლოდ ერთეულებმა შეძლეს. შეფ-მზარეული ტონი მოსი 10 წლის წინათ მოვიდა რესტორანში სამუშაოდ და თითქმის მაშინვე შეიტანა მენიუში ეს გიგანტი ბურგერი. „წლის განმავლობაში ჩვენ 4-5 მსგავს ბურგერს ვყიდით“, - აღნიშნავს ის.
გიგანტურ ჰამბურგერს სასტუმრო Peninsular-ის თითქმის ყველა სტუმარს სთავაზობენ. მსურველმა შეკვეთა წინასწარ უნდა მისცეს - სულ ცოტა, 24 საათით ადრე. საქმე ისაა, რომ 3,5-კილოიანი ბურგერისთვის ფუნთუშები მხოლოდ შეკვეთით ცხვება. სამაგიეროდ დანარჩენი ყველაფერი საკმაოდ სწრაფად მზადდება - მისი შიგთავსის მომზადებას, სულ რაღაც, 25 წუთი სჭირდება.
36 სანტიმეტრი დიამეტრის ბურგერი ძროხის ხორცის ორი, 1,2-კილოგრამიანი კატლეტის, ბეკონის ხუთი შემწვარი ნაჭრისა და ხუთი კვერცხისგან შედგება. აქვე უნდა მივათვალოთ პომიდვრები, სალათა, ხახვი, ყველი და სხვა წვრილმანები.
ყველა, ვინც გიგანტურ ბურგერს შეუკვეთს, „ბურგერულ შეჯიბრში“ მონაწილეობს, რომელიც სასტუმროს მფლობელმა კეიტ ბერნსმა მოიფიქრა. ის ვინც ბურგერს 3 საათში შეჭამს, არც მის საფასურს გადაიხდის და დამატებით 100 დოლარსაც მიიღებს. შეფ-მზარეულის განცხადებით, ბოლო ცხრა წლის მანძილზე ბურგერთან ჭიდილში მხოლოდ ორი გამარჯვებული გამოვლინდა.
