გასულ კვირას ქარიშხალმა „ჰარვიმ“ ტეხასის შტატს გადაუარა და ქალაქ ჰიუსტონში მასშტაბური ნგრევები გამოიწვია, რაც შტატს 100 მილიარდი დოლარი დაუჯდება. ამის მიუხედავად, წყალდიდობის ეპიცენტრში მოხვედრილმა ცეცხლოვანმა ჭიანჭველებმა თავიანთი ერთიანობის წყალობით გადარჩენა მოახერხეს.
მწერები მხოლოდ კოლექტიური გრძნობის გამო გადარჩნენ - მათ მცურავი კოლონიები შექმნეს. ჰიუსტონის მცხოვრებლები ჯერ კიდევ ნახულობენ ჭიანჭველების „კუნძულებს“.
ჯორჯიის ტექნოლოგიური ინსტიტუტის კვლევის თანახმად, ცეცხლოვანი ჭიანჭველები წებოვანი მანდიბულებით ერთმანეთს ეკვრიან და ქმნიან ტივს, რომელიც წყალზე კარგად ბალანსირებს. ამაში მას ჭიანჭველების გარშემო შექმნილი ჰაერის ბუშტუკები ეხმარება.
ტივის პირველ ფენაზე მწერებს ჭიანჭველების ბუდიდან კვერცხები, მატლები და ჭუპრები გადააქვთ. ამგვარი ტივით ჭიანჭველები მანამდე მოგზაურობენ, სანამ ხმელეთს არ მიაღწევენ. ზოგჯერ ეს ცურვა რამდენიმე კვირა გრძელდება.
შორიდან ეს კონსტრუქცია ხის ნაფოტებისგან აგებულ კონსტრუქციას მოგაგონებთ, მაგრამ თუ კარგად დააკვირდებით, ათასობით მოფუთფუთე ჭიანჭველას შეამჩნევთ.
