ჩვენთვისაც ძნელია, ამ ავტომობილის არსებობა ავხსნათ. „ფოლკსვაგენ-ხოჭოს“ როგორ ძარას არ უკეთებდნენ, როგორი ტიუნინგი არ შეეხო ამ უკვდავ ავტომობილს, მაგრამ ხორვატული სახელოსნო MG Vrbanus-ის ვერსია უბრალოდ წარმოუდგენელია.
სამჭედლო სახელოსნო MG Vrbanus ქალაქ სისაკში მდებარეობს, ზაგრებიდან 50 კილომეტრში. სახელოსნო ძველია, ის ჯერ კიდევ 30 წლის წინათ დააარსეს. ამჯერად მჭედლებმა გადაწყვიტეს, სავიზიტო ბარათი შეექმნათ, ყველასთვის ეჩვენებინათ, რა შეეძლოთ.
VW Beetle-ის ძარა ხელით ნაჭედი რკინისგანაა დამზადებული. ძარის ყოველი ელემენტი უნიკალურია და ჭედვის სხვადასხვა მეთოდებია გამოყენებული. სულ, ძარის დამზადებას 3500 ადამიანი/საათი დასჭირდა. ჯამში, ამან სადღაც ნახევარი წელი შეადგინა. ბევრი ელემენტი მოოქროვილია და Swarovski-ს კრისტალებით არის დამშვენებული (5000 ცალზე მეტი).
ორიგინალური დარჩა შასი, ძრავა და ზოგიერთი წვრილი დეტალი, მაგალითად, უკანა ხედვის სარკე. და, რა თქმა უნდა, საქარე მინები. ამასთანავე, ავტომობილი მთლიანად გამჭვირვალეა და ის სულ ოდნავ დამძიმდა ორიგინალთან შედარებით. ჰო, მართლა, დადის კიდეც.
ავტომობილი ოფიციალურად 2002 წლის მიუნხენის ბაზრობაზე წარადგინეს. ამას გარდა, იგი დამატებით შეამკვეს ესენის 2012 წლის ავტოშოუსთვის. ავტომობილი არ იყიდება, ის MG Vrbanus-ის „ვიტრინაა“.