მტი-ის ბიოინჟინერმა ვენ ვანმა (Wen Wang), კოლეგებთან ერთად, შექმნა მაისური, რომელიც ლატექსისგან არის დამზადებული და მინიატურული სავენტილაციო სარქველები აქვს. ეს სარქველები იმისდა მიხედვით იღება და იხურება, რამდენ სითბოს გამოყოფს სხეული.
რაც ყველაზე საინტერესოა, სარქველები ბაქტერიების მეშვეობით რეგულირდება!
ბაქტერიები ტენზე რეაგირებენ. ისინი ფართოვდებიან მაღალი ტენიანობის შემთხვევაში და იკუმშებიან, როცა ჰაერი მშრალი ხდება.
როგორც მკვლევარებმა აღმოაჩინეს, ბაქტერიების ამგვარ რეაქციას საკმარისი ძალა აქვს, რათა მაისურის „ფორები“ გახსნას. მეცნიერებმა სამფენოვანი ქსოვილი შექმნეს, რომელსაც კანის ტემპერატურაზე მორეაგირე სარქველები გააჩნია.
მოხალისეებს ახალი მაისურები სირბილისა და ველოსიპედის ტარების დროს ეცვათ. როგორც აღმოჩნდა, სარქველები უკვე მეხუთე წუთზე იხსნებოდნენ. ოფლი ორთქლდებოდა და მოხალისის სხეულს აგრილებდა.
აქვე უნდა აღინიშნოს, რომ სარქველები ადამიანის ანატომიური აღნაგობის მიხედვით არის განაწილებული. ყველაზე დიდი სარქველები იმ ადგილებში მდებარეობს, სადაც ყველაზე მეტი სითბო გამოიყოფა.
ახლა მეცნიერებს ახალი სამუშაო ელით: სანამ კომერციულ მოდელს შექმნიან, მანამდე მათ იმაზე უნდა იზრუნონ, რომ მაისურის გარეცხვა შეიძლებოდეს.
სპორტული ტანსაცმლის ამერიკულმა მწარმოებელმა New Balance-მა მეცნიერებთან კონტაქტი უკვე დაამყარა და მათი სპონსორობა თავის თავზე აიღო.
